ഡല്‍ഹി കോണ്‍ഗ്രസ് അധ്യക്ഷന്‍ രാജിവെച്ചതായി റിപ്പോര്‍ട്ട്

ന്യൂഡല്‍ഹി: മുതിര്‍ന്ന കോണ്‍ഗ്രസ് നേതാവ് അജയ് മാക്കന്‍ ഡല്‍ഹി കോണ്‍ഗ്രസ് അധ്യക്ഷസ്ഥാനം രാജിവെച്ചതായി റിപ്പോര്‍ട്ട്. ആരോഗ്യസ്ഥിതി മോശമാണെന്ന് കാട്ടിയാണ് രാഹുല്‍ ഗാന്ധിക്ക് രാജിക്കത്ത് അയച്ചിരിക്കുന്നതെന്നാണ് സൂചന.

അജയ് മാക്കന്‍റെ രാജി സംബന്ധിച്ചുള്ള വാര്‍ത്തകള്‍ കോണ്‍ഗ്രസ് നിഷേധിച്ചു. ആരോഗ്യപ്രശ്നങ്ങള്‍ കാരണം വിദേശത്തേക്ക് ചികിത്സക്കു പോയതാണെന്ന് കോണ്‍ഗ്രസ് നോതാവ് പിസി ചാക്കോ അറിയിച്ചു. അദ്ദേഹത്തിന്‍റെ രാജി സംബന്ധിച്ച വാര്‍ത്തകള്‍ തെറ്റാണെന്നും പിസി ചാക്കോ ചൂണ്ടിക്കാട്ടി.

പാര്‍ട്ടിയുടെ പ്രവര്‍ത്തനങ്ങള്‍ക്കായി സമയം മാറ്റിവയ്ക്കാന്‍ സാധിക്കാത്തതില്‍ മാക്കന്‍ ആശങ്ക അറിയിക്കാറുണ്ടായിരുന്നു. നിലവിലെ സ്ഥിതിയില്‍ അദ്ദേഹത്തിന് കുഴപ്പമൊന്നുമില്ല. പരിശോധനകള്‍ക്കുശേഷം തിരിച്ചെത്തുമ്പോള്‍ ഭാവി കാര്യങ്ങള്‍ ചര്‍ച്ചചെയ്യുമെന്നും ചാക്കോ വ്യക്തമാക്കി.

2015 ലാണ് ഡല്‍ഹി കോണ്‍ഗ്രസ് അധ്യക്ഷ സ്ഥാനത്തേക്ക് അജയ് മാക്കന്‍ എത്തുന്നത്. നിയമസഭാ തിരഞ്ഞെടുപ്പിലെ കോണ്‍ഗ്രസിന്‍റെ ദയനീയ പരാജയത്തെതുടര്‍ന്ന് മാക്കന്‍ രാജി സന്നദ്ധത അറിയിച്ചിരുന്നെങ്കിലും അധ്യക്ഷ സ്ഥാനത്ത് തുടരാന്‍ കോണ്‍ഗ്രസ് ഹൈക്കമാന്‍ഡ് നിര്‍ദ്ദേശം നല്‍കുകയായിരുന്നു. യുപിഎ ഭരണകാലത്ത് കേന്ദ്രമന്ത്രിയായിരുന്നു അജയ് മാക്കന്‍.