അയോധ്യ വിധി പുനഃപരിശോധിക്കാന്‍ ഹര്‍ജി നല്‍കും: മുസ്ലീം വ്യക്തിനിയമ ബോര്‍ഡ്‍

ലഖ്‍നൗ: അയോധ്യ തര്‍ക്കഭൂമി രാമക്ഷേത്ര നിര്‍മ്മാണത്തിന് നല്‍കാനുള്ള സുപ്രീംകോടതി വിധി പുനപരിശോധിക്കാന്‍ ഹര്‍ജി നല്‍കുമെന്ന് ഓള്‍ ഇന്ത്യ മുസ്ലീം പേഴ്‍സണല്‍ ലോ ബോര്‍ഡ്‍ (എഐഎംപിഎല്‍ബി). ഞായറാഴ്‍ച്ച രാവിലെ ചേര്‍ന്ന യോഗത്തിലാണ് ഇക്കാര്യത്തില്‍ തീരുമാനമായത്.

അയോധ്യ വിധി അനുസരിച്ച് തര്‍ക്കഭൂമിക്ക് പുറത്തുനല്‍കിയ അഞ്ച് ഏക്കര്‍ സ്ഥലം സ്വീകരിക്കേണ്ടെന്നും എഐഎംപിഎല്‍ബി തീരുമാനിച്ചിട്ടുണ്ട്. കേസിലെ മറ്റൊരു പ്രധാന മുസ്ലീം കക്ഷിയായ വഖഫ് ബോര്‍ഡ്‍ പുനപരിശോധനയ്‍ക്ക് ഇല്ലെന്ന് വിധി പ്രസ്‍താവിച്ച ദിവസം തന്നെ മാധ്യമങ്ങളോട് പറഞ്ഞിരുന്നു.


ദശാബ്‍ദങ്ങളായി നീളുന്ന അയോധ്യ തര്‍ക്കത്തില്‍ കഴിഞ്ഞ ആഴ്‍ച്ചയാണ് സുപ്രീംകോടതി അന്തിമ വിധി പ്രഖ്യാപിച്ചത്. തര്‍ക്കഭൂമിയുടെ ഉടമസ്ഥാവകാശം തെളിയിക്കാന്‍ കഴിഞ്ഞില്ലെന്ന് കാണിച്ച് രാമജന്മഭൂമി എന്ന പേരില്‍ നൂറ്റാണ്ടുകളായി അറിയപ്പെടുന്ന സ്ഥലം ഹിന്ദുമത വിശ്വാസികള്‍ക്ക് നല്‍കാന്‍ സുപ്രീംകോടതി തീരുമാനിക്കുകയായിരുന്നു.

Also Read: ശബരിമലയെ അയോധ്യ വിധി സ്വാധീനിക്കുമോ?

പള്ളി പണിയുന്നതിന് വേണ്ടി തര്‍ക്കഭൂമിക്ക് പുറത്ത് അഞ്ചേക്കര്‍ സ്ഥലം വിട്ടുനല്‍കാനും തീരുമാനിച്ചു. വിധിയില്‍ നിരാശയുണ്ടെങ്കിലും പുനഃപരിശോധന നല്‍കുന്നില്ലെന്നായിരുന്നു കേസിലെ കക്ഷികളുടെ തീരുമാനം. എന്നാല്‍ മുസ്ലീം വ്യക്തിനിയമ ബോര്‍ഡ് മാത്രം യോഗം ചേര്‍ന്ന് നിയമവഴികള്‍ ആലോചിക്കുമെന്നായിരുന്നു മാധ്യമങ്ങളോട് പറഞ്ഞത്.

Also Read: 'അഞ്ച് ഏക്കർ ഭൂമി സുന്നി വഖഫ് ബോർഡ് സ്വീകരിക്കരുത്'

കാലാവധി പൂര്‍ത്തിയാക്കുന്ന ചീഫ് ജസ്റ്റിസ് രഞ്ജന്‍ ഗൊഗോയി അധ്യക്ഷനായ അഞ്ചംഗ ബെഞ്ചാണ് ഏകകണ്ഠമായി വിധി പറഞ്ഞത്. അയോധ്യയിലെ 2.77 ഏക്കര്‍ ഭൂമിയെ ചൊല്ലിയാണ് തര്‍ക്കം നിലനിന്നിരുന്നത്. നിര്‍മോഹി അഖാഡ, സുന്നി വഖഫ് ബോര്‍ഡ്, ഹിന്ദു മഹാസഭ എന്നിവര്‍ തമ്മിലായിരുന്നു തര്‍ക്കം.