പിഴത്തുക പ്രളയബാധിതര്‍ക്ക് നല്‍കണമെന്ന് അലഹബാദ് ഹൈക്കോടതി

അലഹബാദ്: കോടതിയിലടക്കേണ്ട പിഴത്തുക കേരളത്തിലെ പ്രളയബാധിതര്‍ക്ക് നല്‍കാന്‍ ഉത്തരവിട്ട് അലഹബാദ് ഹൈക്കോടതി. ഹാപ്പൂരിലെ വൈദ്യുതി വകുപ്പിന് ചുമത്തിയ ഒരു ലക്ഷം രൂപയുടെ പിഴയാണ് മുഖ്യമന്ത്രിയുടെ ദുരിതാശ്വാസ നിധിയിലേക്ക് അടക്കാന്‍ കോടതി ഉത്തരവിട്ടത്. ഗൗരവ് ശര്‍മ്മ എന്നയാള്‍ സമര്‍പ്പിച്ച പരാതിയുടെ അടിസ്ഥാനത്തിലാണ് നടപടി.

ജസ്റ്റിസ് ശശികാന്ത് ഗുപ്ത, ജസ്റ്റിസ് അജിത് കുമാര്‍ എന്നിവരടങ്ങിയ ബഞ്ചാണ് വൈദ്യുതി ബോര്‍ഡിനെതിരായ ഗൗരവ് ശര്‍മ്മയുടെ പരാതി പരിഗണിച്ചത്. നിരവധി തവണ ആവശ്യപ്പെട്ടിട്ടും കോടതിയില്‍ ഹാജരാകാനോ മറുപടി നല്‍കാനോ തയ്യാറാകാത്തതിനാലാണ് കോടതി പിഴ വിധിച്ചത്. നേരത്തേ ഹരിയാനയിലെ പഞ്ചകുല കോടതിയും പിഴത്തുക കേരളത്തിലെ പ്രളയ ബാധിതര്‍ക്ക് നല്‍കാന്‍ വിധിച്ചിരുന്നു.