അലഹാബാദ് ഇനി പ്രയാഗ് രാജ്; യോഗിയെ ട്രോളി കഠ്ജുവിന്റെ ട്വീറ്റ്

ലഖ്നൌ: ഉത്തർപ്രദേശിലെ അലഹാബാദ് നഗരത്തിന്റെ പേര് പ്രയാഗ് രാജ് എന്നാക്കി മാറ്റുമെന്ന് മുഖ്യമന്ത്രി യോഗി ആദിത്യനാഥ് പ്രഖ്യാപിച്ചതിനുപിന്നാലെ യോഗിയെ പരിഹസിച്ച് ജസ്റ്റിസ് മാർക്കണ്ഡേയ കഠ്ജുവിന്റെ ട്വീറ്റ്. യുപിയിടെ 18 നഗരങ്ങൾക്ക് പ്രധാനമന്ത്രി നരേന്ദ്ര മോദി അടക്കമുള്ള ബിജെപി നേതാക്കളുടെ പേരു നൽകിയാണ് കഠ്ജുവിന്റെ പരിഹാസം.

ഫൈസാബാദിന് നരേന്ദ്രമോദിപുർ, ഫത്തേപുറിന് അമിത് ഷാ നഗർ എന്നും മൊറാദാബാദിന് മൻകിബാത്ത് നഗർ എന്നും പേര് നൽകണമെന്ന് കഠ്ജു പരിഹസിച്ചു.

യോഗി ആദിത്യനാഥിനെ അഭിസംബോധന ചെയ്യുന്ന ട്വീറ്റിൽ അലഹാബാദിന് പ്രയാഗ് രാജ് എന്ന് പേരുനൽകിയതിൽ അഭിനന്ദിക്കുന്നുവെന്നും യുപിയിലെ 18 താൻ നിർദ്ദേശിക്കുന്ന പേരുകൾ നൽകണമെന്നുമാണ് ട്വീറ്റ് ചെയ്തിരിക്കുന്നത്.
കഠ്ജു നിർദ്ദേശിച്ച പേരുകൾ ഇങ്ങനെ,

അലിഗഢ്- അശ്വത്ഥാത്മാ നഗര്‍
ആഗ്ര- അഗസ്ത്യനഗര്‍
ഗാസിപുര്‍- ഗണേഷ്പുര്‍
ഷാജഹാന്‍പുര്‍-സുഗ്രീവ്പുര്‍
മുസ്സാഫര്‍നഗര്‍- മുരളീമനോഹര്‍നഗര്‍
അസംഗഢ്-അളക്‌നന്ദ്പുര്‍
ഹമിര്‍പുര്‍-ഹസ്തിന്‍പുര്‍
ലഖ്‌നൗ- ലക്ഷ്മണ്‍പുര്‍
ബുലന്ദ്ഷഹര്‍-ബജ്‌റംഗ്ബലിപുര്‍
ഫൈസാബാദ്-നരേന്ദ്രമോദിപുര്‍
ഫത്തേപുര്‍-അമിത്ഷാനഗര്‍
ഗാസിയാബാദ്-ഗജേന്ദ്രനഗര്‍
ഫിറോസാബാദ്-ദ്രോണാചാര്യനഗര്‍
ഫറൂഖാബാദ്-അംഗദ്പുര്‍
ഗാസിയാബാദ്- ഘടോത്കച് നഗര്‍
സുല്‍ത്താന്‍പുര്‍- സരസ്വതിനഗര്‍
മൊറാദാബാദ്-മന്‍കിബാത് നഗര്‍
മിര്‍സാപുര്‍- മീരാബായിനഗര്‍

പ്രയാഗ് രണ്ട് നദികളുടെ സംഗമ സ്ഥലമാണ്. എന്നാൽ അലഹാബാദിൽ ഗംഗ, യമുന, സരസ്വതി എന്നീ നദികൾ സംഗമിക്കുന്ന സ്ഥലമാണ്. അതിനാലാണ് അലഹാബാദിന് പ്രയാഗ് രാജ് എന്ന് പേരുനൽകുന്നതെന്നും അലഹാബാദ് വെസ്റ്റ് എം പി സിദ്ധാർത്ഥ് നാഥ് സിങ്ങ് പറഞ്ഞു.

താനാണ് അലഹാബാദിന്റെ പേര് പ്രയാഗ് രാജ് എന്നാക്കി മാറ്റണമെന്ന് ഗവർണറോട് പറഞ്ഞത്. തുടർന്ന് മറ്റുള്ളവരും അതിൽ താത്പര്യം പ്രകടിപ്പിച്ചു. മന്ത്രിസഭായോഗം അത് അംഗീകരിക്കുകയായിരുന്നുവെന്നും സിങ് പറഞ്ഞു.