ബിജെപിക്കെതിരെ മഹാസഖ്യം: പ്രതിപക്ഷ പാർട്ടികൾ ഒന്നിക്കുന്നു

ഹൈദരാബാദ്: ലോക‍്‍സഭാ തെരഞ്ഞെടുപ്പിൽ ബിജെപിക്കെതിരെ ഒന്നിച്ച് മത്സരിക്കാൻ പ്രതിപക്ഷ പാർട്ടികൾ കൈ കോർക്കുന്നു. കോൺഗ്രസ് അടക്കമുള്ള രാഷ്ട്രീയ പാർട്ടികൾ സഖ്യത്തിൻെറ ഭാഗമാവും. ആന്ധ്രപ്രദേശ് മുഖ്യമന്ത്രിയും തെലുഗുദേശം പാർട്ടി നേതാവുമായ ചന്ദ്രബാബു നായിഡുവിൻെറ നേതൃത്വത്തിലാണ് സഖ്യചർച്ചകൾ പുരോഗമിക്കുന്നത്.

ഈ മാസം 22ന് വിവിധ പാർട്ടികളുടെ യോഗം വിളിച്ചിട്ടുണ്ട്. യോഗത്തിൽ ഭാവിപരിപാടികൾ ചർച്ച ചെയ്യാനാണ് തീരുമാനം. പ്രാദേശിക പാർട്ടികളുടെ നേതൃത്വത്തിൽ വിശാലസഖ്യമാവും രൂപീകരിക്കുക. ഡിഎംകെ അധ്യക്ഷൻ എംകെ സ്റ്റാലിൻ, മുതിർന്ന കോൺഗ്രസ് നേതാക്കൾ എന്നിവരുമായി നായിഡു ചർച്ചകൾ നടത്തിക്കഴിഞ്ഞു.

കോൺഗ്രസ് ജനറൽ സെക്രട്ടറി അശോക് ഗെഹ്ലോട്ടുമായി അദ്ദേഹം ചർച്ച നടത്തിയിരുന്നു. സിപിഎം, തൃണമുൽ കോൺഗ്രസ്, ജനതാദൾ (എസ്) തുടങ്ങിയ പാർട്ടികളെയെല്ലാം സഖ്യത്തിൽ ഒന്നിച്ച് നിർത്താനാണ് ലക്ഷ്യമിടുന്നത്.