101 സൈനിക ഉപകരണങ്ങള്‍ക്ക് ഇറക്കുമതി നിരോധനം; തദ്ദേശീയമായി നിര്‍മിക്കുമെന്ന് പ്രതിരോധമന്ത്രി

ന്യൂഡൽഹി: പ്രതിരോധരംഗത്ത് രാജ്യത്ത് സ്വയംപര്യാപ്തത നേടുന്നതിൻ്റെ ഭാഗമായി 101 ഉത്പന്നങ്ങള്‍ രാജ്യത്ത് തദ്ദേശീയമായി നി‍ര്‍മിക്കുമെന്ന് പ്രതിരോധമന്ത്രി രാജ്നാഥ് സിങ്. ആത്മനിര്‍ഭര്‍ ഭാരത് പദ്ധതിയുടെ ഭാഗമായാണ് പ്രതിരോധമന്ത്രിയുടെ പ്രഖ്യാപനം. ഈ ഉത്പന്നങ്ങളുടെ വിദേശത്തു നിന്നുള്ള ഇറക്കുമതി പൂര്‍ണമായി അവസാനിപ്പിക്കുമെന്ന് പ്രതിരോധമന്ത്രി അറിയിച്ചു. ആത്മനിര്‍ഭര്‍ ഭാരത് പദ്ധതിയക്കായി കേന്ദ്രസര്‍ക്കാര്‍ പ്രത്യേക ഫണ്ട് നീക്കിവെച്ചിട്ടുണ്ടെന്നും കേന്ദ്രമന്ത്രി അറിയിച്ചു.

രാജ്യത്തേയ്ക്കുള്ള ഇറക്കുമതി അവസാനിപ്പിക്കാനുള്ള 101 പ്രതിരോധ ഉപകരണങ്ങളുടെ പട്ടിക ആഭ്യന്തര മന്ത്രാലയം തയ്യാറാക്കിയിട്ടുണ്ട്. ഒരു നിശ്ചിത കാലയളവിനു ശേഷം ഇവയുടെ ഇറക്കുമതി പൂര്‍ണമായി അവസാനിപ്പിക്കാനും നിര്‍മാണം പൂര്‍ണമായും ഇന്ത്യയിൽ തന്നെ നടത്താനുമാണ് പദ്ധതി. സ്വയംപര്യാപ്തതയിലേയ്ക്കുള്ള ഒരു വലിയ ചുവടുവെയ്പ്പാണ് ഇതെന്ന് പ്രതിരോധമന്ത്രി വ്യക്തമാക്കി. സൈന്യത്തിന് ആവശ്യമായ ഉപകരണങ്ങളും സാങ്കേതികവിദ്യകളും ഡിആര്‍ഡിഓയ്ക്ക് സ്വന്തമായി വികസിപ്പിക്കാൻ സാധിക്കുന്നതോടെ രാജ്യത്തെ പ്രതിരോധ വ്യവസായം ശക്തിപ്പെടുമെന്ന് രാജ്നാഥ് സിങ് പറഞ്ഞു.

Also Read: കൊവിഡ് കൊണ്ടുപോയത് ഇന്ത്യയുടെ 196 ഡോക്ടർമാരെ; പ്രധാനമന്ത്രിയോട് അഭ്യര്‍ഥനയുമായി ഐഎംഎ

സേനകളുമായും പൊതു സ്വകാര്യ രംഗത്തെ സ്ഥാപനങ്ങളുമായും പലവട്ടം ചര്‍ച്ച ചെയ്ത ശേഷമാണ് ഇക്കാര്യത്തിൽ നടപടിയെടുത്തതെന്നും മന്ത്രി പറഞ്ഞു. സ്വകാര്യ സ്ഥാപനങ്ങള്‍ക്കും പ്രതിരോധ വ്യവസായ രംഗത്ത് പങ്കാളിത്തം നല്‍കുമെന്ന് മുൻപ് ധനമന്ത്രി നിർമലാ സീതാരാമൻ വ്യക്തമാക്കിയിരുന്നു. 2015 മുതൽ 3.5 ലക്ഷം കോടി രൂപയുടെ പദ്ധതികളാണ് ഇതുവരെ ഒപ്പിട്ടതെങ്കിൽ വരുന്ന ആറോ ഏഴോ വര്‍ഷത്തിനുള്ളിൽ നാല് ലക്ഷം കോടി രൂപയുടെ കരാര്‍ രാജ്യത്തെ സ്ഥാപനങ്ങളുമായി ഒപ്പിടുമെന്നും മന്ത്രി പറഞ്ഞു. ഈ കാലയളവിൽ 1.3 ലക്ഷം കോടി രൂപയുടെ ആയുധങ്ങള്‍ കരസേനയ്ക്കും വ്യോമസേനയ്ക്കും ആവശ്യമായി വരും. 1.4 ലക്ഷം കോടിയുടെ ഉപകരണങ്ങള്‍ നാവികസേനയ്ക്കും ആവശ്യമായി വരും. രാജ്യത്ത് തദ്ദേശീയമായി വികസിപ്പിക്കുന്ന ഉപകരണങ്ങള്‍ ചെറിയ ഭാഗങ്ങളല്ലെന്നും ആര്‍ട്ടില്ലറി ഗണ്ണുകള്‍, അസോള്‍ട്ട് റൈഫിളുകള്‍, സോണാര്‍ സിസ്റ്റം, വിമാനങ്ങല്‍, റഡാറുകള്‍ തുടങ്ങിയ ആധുനിക ഉപകരണങ്ങളായിരിക്കുമെന്നും പ്രതിരോധമന്ത്രി പറഞ്ഞു.

Also Read: കനത്ത മഴ തുടരുമെന്ന് കാലാവസ്ഥാ മുന്നറിയിപ്പ്, മുല്ലപ്പെരിയാറിൽ 135.25 അടി വെള്ളം

ഞായറാഴ്ച 10 മണിയ്ക്ക് ഒരു സുപ്രധാന പ്രഖ്യാപനമുണ്ടാകുമെന്ന് കേന്ദ്ര പ്രതിരോധ മന്ത്രി രാജ്നാഥ് സിങ് അറിയിച്ചിരുന്നു. പ്രതിരോധ മന്ത്രാലയത്തിൻ്റെ ഔദ്യോഗിക ട്വിറ്റർ ഹാൻഡിലിലൂടെയായിരുന്നു അറിയിപ്പ്.