ന്യൂഡൽഹി: രാജ്യത്ത് കൊറോണ വൈറസ് ഭീതി തുടരുകയും വൈറസ് ബാധയെ പ്രതിരോധിക്കാൻ കേന്ദ്ര - സംസ്ഥാന സര്‍ക്കാരുകള്‍ കനത്ത നടപടികള്‍ സ്വീകരിക്കുകയും ചെയ്യുന്നതിനിടെയും തിരക്കൊഴിയാതെ ഷഹീൻ ബാഗ്. പൗരത്വ നിയമ ഭേദഗതിയ്ക്കും പൗരത്വ രജിസ്റ്ററിനുമെതിരെ ഡൽഹിയിലെ ഷഹീൻബാഗിൽ തുടരുന്ന കനത്ത പ്രതിഷേധം കൊറോണ വൈറസ് ആശങ്കയ്ക്കിടയിലും തുടരുകയാണെന്നാണ് ദേശീയ മാധ്യമങ്ങളുടെ റിപ്പോര്‍ട്ട്.
Also Read: ഇന്ത്യയിൽ കൊറോണ രോഗികളുടെ എണ്ണം 100 കടന്നു; അതീവജാഗ്രതയിൽ രാജ്യം
രോഗലക്ഷണങ്ങള്‍ ഉള്ളവര്‍ പ്രതിഷേധത്തിന് എത്തരുതെന്നാണ് നിര്‍ദ്ദേശിച്ചിട്ടുള്ളതെന്നാണ് പ്രതിഷേധക്കാര്‍ മാധ്യമങ്ങളോടു പറയുന്നത്. പലരും മാസ്ക് ധരിച്ചാണ് പ്രതിഷേധത്തിന് എത്തിയിട്ടുള്ളത്. കൊറോണ വൈറസിനെക്കാള്‍ വലിയ പ്രശ്നമാണ് പൗരത്വ നിയമ ഭേദഗതിയും പൗരത്വ രജിസ്റ്ററും എന്നാണ് ചിലര്‍ പറയുന്നത്. ഷഹീൻ ബാഗിൽ ആളുകള്‍ക്ക് പരിശോധന നടത്തണമെന്ന നിര്‍ദ്ദേശവും ചിലര്‍ ഉയര്‍ത്തി.
നിലവിൽ ഡൽഹിയിൽ ഏഴു പേര്‍ക്കാണ് ഡൽഹിയിൽ കൊറോണ വൈറസ് ബാധ സ്ഥിരീകരിച്ചിട്ടുള്ളത്. ഇതിൽ ഒരാള്‍ മരണപ്പെട്ടു. അസുഖം ബാധിച്ച് ആശുപത്രിയിൽ ചികിത്സയിലായിരുന്ന ഒരാള്‍ സുഖം പ്രാപിച്ച് ആശുപത്രി വിട്ടതായാണ് വിവരം. മയൂര്‍ വിഹാര്‍ ഫേസ് ടു സ്വദേശിയായ ഇയാള്‍ ഇറ്റലിയിൽ നിന്ന് മടങ്ങിയെത്തിയ ആളാണ്. രോഗികളുടെ എണ്ണത്തിൽ വര്‍ധനവുണ്ടാകുന്ന സാഹചര്യത്തിലാണ് തലസ്ഥാനത്ത് വലിയ ആള്‍ക്കൂട്ടങ്ങള്‍ക്ക വിലക്കേര്‍പ്പെടുത്തിയത്.
Also Read: മധ്യപ്രദേശ് സർക്കാരിനെ 'കൊറോണ സംരക്ഷിക്കുമോ'; നടക്കാൻ പോകുന്നത് ഈ കാര്യങ്ങളോ ?
സംസ്ഥാനത്തെ എല്ലാ സിനിമാ തീയേറ്ററുകളും സ്കളുകളും കോളേജുകളും മാര്‍ച്ച് 31 വരെ അടച്ചിടാനാണ് സംസ്ഥാന സര്‍ക്കാരിന്‍റെ നിര്‍ദ്ദേശം. കൂടാതെ സ്പോര്‍ട്സ് പരിപാടികള്‍, സെമിനാറുകള്‍, കോൺഫറൻസുകള്‍ തുടങ്ങി 200 പേരിൽ അധികം സംബന്ധിക്കുന്ന എല്ലാ പരിപാടികള്‍ക്കും വിലക്കേര്‍പ്പെടുത്തിയിട്ടുണ്ട്. എന്നാൽ ഇതു ലംഘിച്ചും ആളുകള്‍ ഒത്തു കൂടുന്നുണ്ടെന്നും ഇവരോട് അഭ്യര്‍ഥിക്കാൻ മാത്രമേ സാധിക്കൂ എന്നും ഡൽഹി ഉപമുഖ്യമന്ത്രി പറഞ്ഞു.
രാജ്യത്ത് ഇതുവരെ 107 പേര്‍ക്കാണ് കൊവിഡ് 19 രോഗബാധ സ്ഥിരീകരിച്ചിട്ടുള്ളത്. ഇതിൽ പതിനേഴുപേര്‍ വിദേശികളാണ്.