അമിത് ഷായ്ക്ക് പന്നിപ്പനി: എയിംസിൽ പ്രവേശിപ്പിച്ചു

ന്യൂഡൽഹി: ബിജെപി അധ്യക്ഷൻ അമിത് ഷായെ പന്നിപ്പനി (സ്വൈൻ ഫ്ലൂ)യെത്തുടര്‍ന്ന് ആശുപത്രിയിൽ പ്രവേശിപ്പിച്ചു. ഡൽഹി ഓൾ ഇന്ത്യ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിലാണ് അദ്ദേഹത്തെ പ്രവേശിപ്പിച്ചത്. അമിത് ഷായുടെ രോഗവിവരം കേന്ദ്ര ആഭ്യന്തര മന്ത്രി രാജ്നാഥ് സിങും സ്ഥിരീകരിച്ചു.നെഞ്ചുവേദനയും ശ്വാസതടസ്സവും അനുഭവപ്പെട്ടതോടെയാണ് അമിത് ഷായെ ആശുപത്രിയിൽ പ്രവേശിപ്പിച്ചതെന്നാണ് റിപ്പോർട്ടുകൾ. രാത്രി ഒൻപതുമണിയോടെയാണ് ഷായെ ആശുപത്രിയിലെത്തിച്ചത്.

എയിംസിൽ ചികിത്സയിൽ കഴിയുന്ന അമിത് ഷായുമായി സംസാരിച്ചെന്നും അദ്ദേഹം എത്രയും വേഗം സുഖം പ്രാപിക്കട്ടെയെന്ന് ആശംസിക്കുന്നുവെന്നും രാജ്നാഥ് സിങ് ട്വിറ്ററിൽ കുറിച്ചു.

പശ്ചിമബംഗാളിൽ ലോക്സഭാ തെരഞ്ഞെടുപ്പിന് മുന്നോടിയായി റാലികള്‍ക്ക് തുടക്കം കുറിയ്ക്കാനിരിക്കേയാണ് അമിത് ഷായ്ക്ക് രോഗം സ്ഥിരീകരിക്കുന്നത്. മുഖ്യമന്ത്രി മമതാ ബാനര്‍ജി നയിക്കുന്ന മെഗാ ഷോയ്ക്ക് പിന്നാലെ ജനുവരി 20നാണ് പശ്ചിമ ബംഗാളിൽ ആദ്യ റാലി നടത്താൻ നിശ്ചയിച്ചിരുന്നത്. എന്നാൽ ഷാ ചികിത്സയിൽ കഴിയുന്ന സാഹചര്യത്തിൽ റാലികള്‍ നടക്കുന്ന കാര്യം അനിശ്ചിതത്വത്തിലായി.