Amit Shah: അമേഠിയിലും റായ്ബറേലിയിലും ജയിക്കുമെന്ന് അമിത് ഷാ

ന്യൂഡൽഹി: ഉത്തര്‍പ്രദേശിൽ കോൺഗ്രസ് മണ്ഡലങ്ങളായ അമേഠിയിലും റായ്ബറേലിയിലും ജയിച്ചുകയറുമെന്ന് ബിജെപി ദേശീയ അധ്യക്ഷൻ അമിത് ഷാ. അതേസമയം, ഉത്തര്‍ പ്രദേശിൽ ബിഎസ്പിയും എസ്‍‍പിയും തമ്മിലുള്ള സഖ്യം 2019ലെ തെരഞ്ഞെടുപ്പിൽ ബിജെപിയ്ക്ക് വെല്ലുവിളിയാകുമെന്നും അദ്ദേഹം അഭിപ്രായപ്പെട്ടു. എൻ‍ഡിഎ സര്‍ക്കാര്‍ നാലുവര്‍ഷം പൂര്‍ത്തിയാക്കിയതുമായി ബന്ധപ്പെട്ട് സംഘടിപ്പിച്ച പരിപാടിയിൽ സംസാരിക്കവേയാണ് അമിത് ഷാ ബിജെപി അധ്യക്ഷൻ ഇത് വ്യക്തമാക്കിയത്.

മഹാരാഷ്ട്രയിൽ ശിവസേനയുമായുള്ള സഖ്യം ഉപേക്ഷിക്കാൻ പദ്ധതിയില്ലെന്നും 2019ൽ ഇരുപാര്‍ട്ടികളും ഒരുമിച്ച് പോരാടുമെന്നും അമിത് ഷാ വ്യക്തമാക്കി. എന്നാൽ ശിവസേന എൻഡിഎയിൽ നിന്ന് പുറത്തുപോകുകയാണെങ്കിൽ അത് അവരുടെ താത്പര്യമാണെന്നും അദ്ദേഹം വ്യക്തമാക്കി.

അടുത്ത ലോക്സഭാ തെരഞ്ഞെടുപ്പിൽ ബിജെപിയെ ഒറ്റയ്ക്ക് തോൽപ്പിക്കാനാകില്ലെന്ന ബോധ്യമുള്ളതുകൊണ്ടാണ് പ്രതിപക്ഷ പാര്‍ട്ടികള്‍ സമാനസ്വഭാവമുള്ള കക്ഷികളുമായി യോജിക്കുന്നതെന്നും അദ്ദേഹം അഭിപ്രായപ്പെട്ടു. വടക്കുകിഴക്കൻ സംസ്ഥാനങ്ങള്‍, കേരളം, തമിഴ്നാട്, തെലങ്കാന, ആന്ധ്രാ പ്രദേശ്, പശ്ചിമ ബംഗാള്‍ എന്നിവിടങ്ങളിലും ബിജെപി ജയിച്ച് കയറുമെന്ന് അദ്ദേഹം അഭിപ്രായപ്പെട്ടു.