അമിത് ഷായുടെ കണ്ണൂർ പ്രസംഗം ഭരണഘടനാവിരുദ്ധമെന്ന് ഉദ്യോഗസ്ഥർ

ശബരിമലയിൽ എല്ലാ പ്രായത്തിലുമുള്ള സ്ത്രീകൾ പ്രവേശിക്കുന്നതുമായി ബന്ധപ്പെട്ട് ഒക്ടോബർ 27ന് ബിജെപി ദേശീയ അദ്ധ്യക്ഷൻ അമിത് ഷാ കണ്ണൂരിൽ നടത്തിയ പ്രസംഗത്തിനെതിരെ മുൻ ദേശീയ സുരക്ഷാ ഉപദേഷ്ടാവ് അടക്കം 49 മുൻ സിവിൽ ഉദ്യോഗസ്ഥർ. ഭരണഘടനയ്ക്കെതിരായി അമിത് ഷാ നടത്തിയ പ്രസംഗത്തിനെതിരെ സുപ്രീംകോടതി സ്വമേധയാ കേസെടുക്കണമെന്നാണ് ഇവരുടെ ആവശ്യം. അമിത് ഷായുടെ പ്രസംഗം പ്രോത്സാഹിപ്പിക്കരുതെന്ന് പ്രധാനമന്ത്രി നരേന്ദ്രമോദിയോടും ഇവർ ആവശ്യപ്പെട്ടു.

നടപ്പാക്കാൻ കഴിയുന്ന ഉത്തരവുകളേ സുപ്രീംകോടതി പുറപ്പെടുവിക്കാവൂ എന്നും സുപ്രീംകോടതി വിധി നടപ്പാക്കിയാൽ സർക്കാരിനെ താഴെയിറക്കുമെന്നുമാണ് അമിത് ഷാ പറഞ്ഞത്. ആ വാക്കുകൾ ആശങ്കപ്പെടുത്തുന്നതാണ്. ഉചിതമല്ലാത്ത രണ്ട് പരാമർശങ്ങളാണ് അവ. സുപ്രീംകോടതിയുടെ വിധി നടപ്പാക്കുന്നതിൽനിന്ന് മാറി നിൽക്കാൻ കേന്ദ്രം ഭരിക്കുന്ന പാർടിയുടെ അദ്ധ്യക്ഷൻ പറയുന്നത് ആശങ്ക ഉളവാക്കുന്നതാണെന്നും ഉദ്യോഗസസ്ഥർ വ്യക്തമാക്കി.

എല്ലാ രാഷ്ട്രീയ പാർടികളും രാജ്യത്തിന്റെ ഭരണഘടനാ തത്വങ്ങൾ പാലിക്കാമെന്ന് പാർടിയുടെ ഭരണഘടനയിൽ ഉൾക്കൊള്ളിക്കണം. ഇപ്പോൾ ഭരിക്കുന്ന പാർടിയും അത് അംഗീകരിച്ചിട്ടുള്ളതാണ്. വ്യവസ്ഥാ ലംഘനം ഉണ്ടായാൽ ആ പാർടിയുടെ അംഗീകാരം റദ്ദാക്കാൻ തെരഞ്ഞെടുപ്പ് കമ്മീഷന് അധികാരമുണ്ട്.

അമിത് ഷായുടെ പ്രസംഗം ഭരണഘടനാ വിരുദ്ധമാണ്. അത് തിരുത്തപ്പെടാതെ പോയാൽ ദേശീയ രാഷ്ട്രീയത്തിൽ ഗുരുതരമായ ഭവിഷ്യത്തുണ്ടാകും. ഈ സാഹചര്യം പരിഗണിച്ച് തെരഞ്ഞെടുപ്പ് കമ്മീഷൻ വിശദീകരണം തേടണം. പാർടി അദ്ധ്യക്ഷനെ ഉപദേശിക്കാനും ഇക്കാര്യത്തിൽ പിന്തുണയ്ക്കില്ലെന്ന് അറിയിക്കാനും പ്രധാനമന്ത്രി നരേന്ദ്ര മോദി തയ്യാറാകണം. ഭരണഘടനാ ലംഘനം പരിശോധിച്ച് നടപടിയെടുക്കാൻ രാഷ്ട്രപതിയും തയ്യാറാകണമെന്നും മുൻ സിവിൽ സർവ്വീസ് ഉദ്യോഗസ്ഥർ പ്രസ്താവനയിൽ ആവശ്യപ്പെട്ടു.