തൃശൂർ: ഇന്ത്യൻ പ്രധാനമന്ത്രി നരേന്ദ്ര മോദിയുടെ പൗരത്വം തെളിയിക്കുന്ന രേഖകൾ ആവശ്യപ്പെട്ട് വിവരാവകാശ രേഖപ്രകാരം അപേക്ഷ. ചാലക്കുടി പോട്ട സ്വദേശിയായ ജോഷി കല്ലുവീട്ടിലാണ് ചാലക്കുടി നഗരസഭയിൽ ഇതുസംബന്ധിച്ച് അപേക്ഷ സമർപ്പിച്ചത്. മോദി ഇന്ത്യൻ പൗരനാണെന്ന് തെളിയിക്കുന്ന രേഖകൾ വിവരാവകാശ നിയമപ്രകാരം നൽകണമെന്നാണ് അദ്ദേഹത്തിന്‍റെ ആവശ്യം.
ജോഷിയുടെ അപേക്ഷ സെൻട്രൽ ഇൻഫർമേഷൻ ഓഫീസർക്ക് കൈമാറാനാണ് നഗരസഭാ തീരുമാനം. ജനുവരി 13നാണ് ജോഷി ചാലക്കുടി നഗരസഭയിൽ വിവരാവകാശ നിയമപ്രകാരം അപേക്ഷ സമർപ്പിച്ചത്. പ്രധാനമന്ത്രി എന്ത് രേഖയാണ് പൗരത്വം തെളിയിക്കാനായി കൈവശം വച്ചിരിക്കുന്നതെന്നറിയുന്നതിനായാണ് അപേക്ഷ നൽകിയതെന്നാണ് ജോഷി ഇതിനെക്കുറിച്ച് പ്രതികരിച്ചത്.
Also Read: ഡൽഹിയിലെ ബിജെപി സ്ഥാനാർഥി പട്ടിക ഇന്ന് ഇറങ്ങിയേക്കും; മുഖ്യമന്ത്രിയാകാൻ കേന്ദ്ര മന്ത്രിസഭയിലെ പ്രമുഖനോ?
പൗരത്വ നിയമം നിലവിൽ വന്നിട്ടും ഏതൊക്കെ രേഖകളാണ് പൗരത്വം തെളിയിക്കാവുന്ന രേഖകൾ എന്നതിൽ വ്യക്ത വന്നിട്ടില്ലെന്നും ആ സാഹചര്യത്തിൽ പ്രധാനമന്ത്രി കൈവശം വച്ചിരിക്കുന്ന രേഖകളെന്തൊക്കായാണെന്ന് അറിയാൻ കൗതുകം തോന്നിയെന്നും ജോഷി കല്ലുവീട്ടിൽ ഏഷ്യാനെറ്റ് ന്യൂസിനോട് പ്രതികരിച്ചു.
കേന്ദ്ര സർക്കാർ പൗരത്വം നിയമ ഭേദഗതി നടപ്പിലാക്കിയെങ്കിലും പൗരത്വം നിർണ്ണയിക്കുന്നതുമായി ബന്ധപ്പെട്ട മാനദണ്ഡങ്ങളൊന്നും പുറപ്പെടുവിച്ചിട്ടില്ല. ഇത് പലവിധ ആശങ്കകൾക്കും ഇടയാക്കിയിരുന്നു. ഈ സാഹചര്യത്തിലാണ് മോദിയുടെ പൗരത്വ രേഖ ചോദ്യം ചെയ്ത് വിവരാവകാശവുമെത്തിയിരിക്കുന്നത്.