അണ്ണാ ഡി.എം.കെ വനിതാ എം.പി ഡി.എം.കെ എം.പിയെ തല്ലി

ചെന്നൈ: അണ്ണാ ഡി.എം.കെ പാർട്ടിയെയും പാർട്ടി നേതാവ് പുരട്ചി തലൈവി ജയലളിതയെയും മോശമായി ചിത്രീകരിച്ച് സംസാരിച്ചെന്നാരോപിച്ച് അണ്ണാ ഡി.എം.കെ വനിതാ എം.പി ഡി.എം.കെ എം.പിയെ തല്ലി. അണ്ണാഡി.എം.കെ എം.പി ശശികല പുഷ്പയാണ് ഡി.എം.കെ എം.പി ട്രിച്ചി ശിവയെ ഡൽഹി ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ വെച്ച് തല്ലിയത്.

പാർലമെന്‍റ് സമ്മേളനത്തിന് ശേഷം ജെറ്റ് എയർവെയ്‌സ് വിമാനത്തിൽ ചെന്നൈയിലേക്ക് യാത്ര പുറപ്പെടാൻ നിൽക്കുമ്പോഴായിരുന്നു സംഭവം. ട്രിച്ചി ശിവ ജയലളിതയെയും പാർട്ടിയെയും കുറിച്ച് മോശമായി സംസാരിക്കുന്നത് കുറെ സമയം താൻ ക്ഷമിച്ചു കേട്ട് നിന്നെന്നും പിന്നീട് നിയന്ത്രണം വിട്ടു തല്ലുകയായിരുന്നെന്നും ശശികല പിന്നീട് പറഞ്ഞു.

വിമാനത്താവളത്തിൽ നടപടി ക്രമങ്ങൾ പൂർത്തീകരിക്കുന്നതിനിടെ ശശികല പെട്ടന്ന് ശിവയുടെ ഷർട്ടിൽ പിടിച്ചു മുഖത്തടിക്കുകയായിരുന്നു. ശിവ ഉടനെ യാത്ര റദ്ദാക്കി മടങ്ങി. വിഷയത്തെ കുറിച്ച് ചർച്ച ചെയ്യാൻ ശിവ ചെന്നൈയിൽ മടങ്ങിയെത്തി കരുണാനിധിയെ സന്ദർശിച്ചു. തങ്ങൾ തമ്മിൽ വഴക്കുണ്ടായില്ലെന്നും എന്നാൽ ശശികല തന്നെ തല്ലിയെന്നും ശിവ പിന്നീട് പ്രതികരിച്ചു.