സ്റ്റാലിന്‍റെ സ്ഥാനാരോഹണം ഇന്ന് ചര്‍ച്ചയായേക്കും

ചെന്നൈ: ഇന്ന് നടക്കുന്ന ഡിഎംകെ യോഗത്തില്‍ സ്റ്റാലിനെ ഡിഎംകെ പ്രസിഡന്‍റായി നിയമിക്കുന്നതിനുള്ള അന്തിമ തീരുമാനം എടുത്തേക്കുമെന്ന് സൂചന. കരുണാനിധിയുടെ മരണ ശേഷമുള്ള ഡി എം കെ യുടെ ആദ്യ എക്സിക്യൂട്ടീവ് യോഗമാണിത്.

പാർട്ടി ജനറൽ കൗൺസിൽ എന്ന് ചേരുമെന്നും ഇന്നത്തെ യോഗത്തില്‍ പ്രഖ്യാപിക്കും. സമ്മർദ്ദമുയർത്തി പാർട്ടിയിലേക്ക് തിരിച്ചെത്താനുള്ള സ്റ്റാലിന്‍റെ സഹോദരന്‍ അഴഗിരിയുടെ ശ്രമങ്ങളും യോഗത്തിൽ ചർച്ചയായേക്കും. കരുണാനിധിയുടെ യഥാർഥ അണികൾ തനിക്കൊപ്പമാണെന്ന അവകാശവാദവുമായി അഴഗിരി കഴിഞ്ഞ ദിവസം രംഗത്തുവന്നിരുന്നു.

നിലവില്‍ ഡി എം കെ വർക്കിങ് പ്രസിഡന്‍റായ സ്റ്റാലിനുമായുള്ള പോര് കടുപ്പിച്ചതിനെത്തുടർന്ന് അഴഗിരിയെ നാലുകൊല്ലംമുമ്പ് കരുണാനിധി പാർട്ടിയിൽനിന്ന് പുറത്താക്കിയിരുന്നു. 2016 ല്‍ കരുണാനിധി അസുഖ ബാധിതനായ ശേഷം സ്റ്റാലിനാണ് പാര്‍ട്ടി ചുമതലകള്‍ നിര്‍വ്വഹിക്കുന്നത്.


.