നിങ്ങൾ ഇന്ത്യയുടെ പ്രധാനമന്ത്രിയാണോ പാകിസ്ഥാന്‍റെ അംബാസഡറാണോ?; മോദിയോട് മമത

സിൽഗുരി: പ്രധാനമന്ത്രി നരേന്ദ്ര മോദിയ്ക്കെതിരെ രൂക്ഷ വിമർശനവുമായി പശ്ചിമബംഗാൾ മുഖ്യമന്ത്രി മമത ബാനർജി. എല്ലാ ദിവസവും പാകിസ്ഥാനെക്കുറിച്ച് മാത്രം പറയുന്ന പ്രധാനമന്ത്രി അവരുടെ അംബാസഡറാണോയെന്ന് മമത ചോദിച്ചു. എല്ലാ വിഷയത്തിലും പാകിസ്ഥാനെ എന്തിനാണ് മോദി പുകഴ്ത്തുന്നതെന്നും മമത സില്‍ഗുരിയില്‍ പൗരത്വ നിയമ ഭേദഗതിക്കെതിരെ നടന്ന റാലിയിൽ ചോദിച്ചു.

'മഹത്തായ പാരമ്പര്യവും സംസ്കാരവുമുള്ള വലിയൊരു രാജ്യമാണ് ഇന്ത്യ. എന്തുകൊണ്ടാണ് മോദി എല്ലായ്‌പ്പോഴും നമ്മുടെ രാജ്യത്തെ പാകിസ്ഥാനുമായി താരതമ്യം ചെയ്യുന്നത് ? ഹിന്ദുസ്ഥാനെ കുറിച്ച് സംസാരിക്കാന്‍ മോദി തയ്യാറാകണം. നിങ്ങൾ ഇന്ത്യയുടെ പ്രധാനമന്ത്രിയാണോ പാകിസ്ഥാന്‍റെ അംബാസഡറാണോ' മമത ബാനർജി ചോദിച്ചു.

Also Read: CAA:അക്രമ സംഭവങ്ങൾക്ക് പിന്നിൽ പോപ്പുലർ ഫ്രണ്ട്, 25 പ്രവർത്തകർ അറസ്റ്റിലെന്ന് യുപി പോലീസ്

'ആരെങ്കിലും എനിക്ക് ജോലി നൽകണമെന്നോ എനിക്ക് ജോലിയില്ലെന്നോ പറഞ്ഞാൽ പ്രധാനമന്ത്രി അവരോട് പാകിസ്ഥാനില്‍ പോകാനാണ് പറയുന്നത്. ബിസിനസ് നഷ്ടത്തിലായെന്ന് പറയുന്നവരോടും പാകിസ്ഥാനിൽ പോകാൻ പറയുന്നു. പാകിസ്ഥാനെക്കുറിച്ച് അവർ ചർച്ചചെയ്യട്ടെ. നമ്മൾ ഇന്ത്യയിലാണ്. നമ്മൾ ഇന്ത്യയെക്കുറിച്ച് ചർച്ചചെയ്യണം. ഇതാണ് നമ്മുടെ ജന്മനാട്' മമത പറഞ്ഞു.

പൗരത്വ നിയമ ഭേദഗതിക്കെതിരെ സംസാരിച്ച മമത ബാനർജി. ഇപ്പോൾ ഇന്ത്യക്കാർക്ക് നേരിടേണ്ടിവന്നത് നാണക്കേടാണെന്നും പറഞ്ഞു. 'സ്വാതന്ത്രൃം ലഭിച്ച് 70 വർഷങ്ങൾക്ക് ശേഷവും പൗരത്വം തെളിയിക്കേണ്ടി വരുന്നത് നാണക്കേടാണ്' മമത പറഞ്ഞു. എൻആർസി നടപ്പാക്കുന്നതിൽ ബിജെപി മനപ്പൂർവം ആശയക്കുഴപ്പം സൃഷ്ടിക്കുകയാണെന്നും നേതാക്കൾ പരസ്പര വിരുദ്ധമായ പ്രസ്താവനകൾ നടത്തുകയാണെന്നും അവർ പറഞ്ഞു.