ആന്ധ്രപ്രദേശ് മുഖ്യമന്ത്രിക്കെതിരെ അറസ്റ്റ് വാറണ്ട്

ഹൈദരാബാദ്: ആന്ധ്രപ്രദേശ് മുഖ്യമന്ത്രി കെ.ചന്ദ്രബാബു നായിഡു ഉൾപ്പടെ 16 പേർക്കെതിരെ അറസ്റ്റ് വാറണ്ട്. മഹാരാഷ്ട്രയിലെ ധർമബാദ് കോടതിയാണ് വാറണ്ട് പുറപ്പെടുവിച്ചത്. ഈ മാസം 21ന് വാറണ്ട് ലഭിച്ചവർ കോടതിയിൽ ഹാജരാകണമെന്നാണ് നിർദേശം.

2010ലാണ് കേസിന് ആസ്‌പദമായ സംഭവം നടന്നത്. ബാബ്ലി പദ്ധതിക്ക് സമീപം പ്രതിഷേധം സംഘടിപ്പിച്ചതിന് ചന്ദ്ര ബാബു നായിഡു ഉൾപ്പടെയുള്ളവരെ അന്ന് പുനെ ജയിലിൽ പാർപ്പിച്ചിരുന്നു. ഐക്യ ആന്ധ്രപ്രദേശ് പ്രതിപക്ഷ നേതാവായിരുന്നു അന്ന് നായിഡു. പിന്നീട് കേസിൽ ആരോപിതരായവരെ വിട്ടയച്ചു. ഇതിനെതിരെ മഹാരാഷ്ട്ര സ്വദേശി സമർപ്പിച്ച പുനഃപരിശോധന ഹർജിയിലാണ് കോടതി വിധി വന്നിരിക്കുന്നത്. പ്രധാനമന്ത്രിയും ബിജെപിയുമാണ് ചന്ദ്രബാബുവിനെതിരായ നടപടിക്ക് പിന്നിലെന്ന് ടിഡിപി ആരോപിച്ചു. ചന്ദ്രബാബു നായിഡു, സംസ്ഥാന ജലവിഭവവകുപ്പ് മന്ത്രി ഉമാമഹേശ്വര റാവു, മുൻ എംഎൽഎ ജി കമലാകാരൻ എന്നിവർക്കും അറസ്റ്റ് വാറണ്ട് നൽകിയിട്ടുണ്ട്.