പിഎൻബി തട്ടിപ്പിന് ഉത്തരവാദികള്‍ ബാങ്ക് മാനേജ്മെന്‍റെന്ന് ജയ്റ്റ്ലി

ന്യൂഡൽഹി: പഞ്ചാബ് നാഷണൽ ബാങ്കിൽ നിന്ന് വജ്രവ്യാപാരി നീരവ് മോദി 11400 കോടി രൂപയുടെ തട്ടിപ്പു നടത്തിയ സംഭവത്തിൽ ബാങ്ക് മാനേജ്മെന്‍റിനെയും ഓഡിറ്റര്‍മാരെയും പഴിച്ച് കേന്ദ്ര ധനമന്ത്രി അരുൺ ജയ്റ്റ്ലി. വിഷയത്തിൽ പിഎൻബി മാനേജ്മെന്‍റും ഓഡിറ്റര്‍മാരുമാണ് കുറ്റക്കാരെന്ന് ജയ്റ്റ്ലി പറഞ്ഞു.

ഫലപ്രദമായും ശരിയായ രീതിയിലും ഉപയോഗിക്കുമെന്നുറപ്പുള്ളതുകൊണ്ടാണ് മാനേജ്മെന്‍റിന് അധികാരം നല്‍കുന്നതെന്നും അതുകൊണ്ട് എന്തെങ്കിലും വീഴ്ചയുണ്ടായാൽ അതിന് ഉത്തരവാദി മാനേജ്മെന്‍റ് തന്നെയാണെന്നും ജയ്റ്റ്ലി പറഞ്ഞു. തട്ടിപ്പ് കണ്ടെത്തുന്നതിൽ പരാജയപ്പെട്ട ഓഡിറ്റര്‍മാര്‍ ആത്മപരിശോധന നടത്തണമെന്നും ജയ്റ്റ്ലി കൂട്ടിച്ചേര്‍ത്തു.

അസോസിയേഷന്‍ ഓഫ് ഡെവലപ്‌മെന്‍റ് ഫിനാന്‍സിങ് ഇന്‍സ്റ്റിറ്റ്യൂഷന്‍സ് ഇന്‍ ഏഷ്യ ആന്‍ഡ് പസഫിക്കിൻ്റെ ഡല്‍ഹിയില്‍ നടന്ന വാര്‍ഷിക സമ്മേളനത്തില്‍ സംസാരിക്കുകയായിരുന്നു അദ്ദേഹം.