എടിഎമ്മുകളില്‍ പണമില്ല; രാജ്യത്ത് കറന്‍സി ക്ഷാമം രൂക്ഷമാകുന്നു

ന്യൂഡല്‍ഹി: രാജ്യത്ത് കറന്‍സി ക്ഷാമം രൂക്ഷം. എ ടി എമ്മുകളില്‍ പണം കിട്ടാനില്ല. രാജ്യതലസ്ഥാനമായ ഡല്‍ഹിയടക്കമുള്ള ഇടങ്ങളില്‍ കടുത്ത ക്ഷാമമാണ് അനുഭവപ്പെടുന്നത്. അതേസമയം സ്ഥിതി താല്‍ക്കാലികമാണെന്ന് ധനമന്ത്രി അരുണ്‍ ജയ്റ്റ് ലി അറിയിച്ചു.

കര്‍ണാടക, മഹാരാഷ്ട്ര, രാജസ്ഥാന്‍, ഉത്തര്‍ പ്രദേശ്, മധ്യപ്രദേശ്, ആന്ധ്രാപ്രദേശ്, തെലങ്കാന തുടങ്ങിയ സംസ്ഥാനങ്ങളിലാണ് കൂടുതലായും കറന്‍സി ക്ഷാമം രൂക്ഷമായത്. ദക്ഷിണ ഡല്‍ഹിയിലെ ആര്‍കെ പുരം, ഖാന്‍പുര്‍ തുടങ്ങിയ എടിഎമ്മുകളില്‍നിന്നു പണം പിന്‍വലിക്കാനാകുന്നില്ല. ഹൈദരാബാദ്, വാരാണസി തുടങ്ങിയ സ്ഥലങ്ങളില്‍ നിന്നും വ്യാപകമായ പരാതികള്‍ ഉയരുന്നുണ്ട്.

വിപണിയിലും രാജ്യത്തിലെ ബാങ്കുകളിലും ആവശ്യത്തിലുമധികം കറന്‍സിയുണ്ടെന്നും ഇപ്പോഴത്തെ നോട്ടുക്ഷാമം താത്കാലികമാണെന്നും കേന്ദ്രധനമന്ത്രി അരുണ്‍ ജയ്റ്റ്‌ലി അറിയിച്ചു. രാജ്യത്തിന്‍റെ ചിലയിടങ്ങളില്‍ പണത്തിന് കൂടുതല്‍ ആവശ്യം വന്നതിനെ തുടര്‍ന്നാണ് ഇപ്പോഴത്തെ താത്കാലികമായ പ്രതിസന്ധി ഉണ്ടായത്. മൂന്ന് ദിവസത്തിനകം ഇത് പരിഹരിക്കുമെന്നും അദ്ദേഹം ട്വിറ്ററിലൂടെ വ്യക്തമാക്കി.

ഉത്സവ സമയമായതിനാല്‍ ആളുകള്‍ കൂടുതല്‍ പണം പിന്‍വലിച്ചതാണ് പ്രശ്‌നങ്ങള്‍ക്ക് കാരണമായതെന്നാണ് അധികൃതര്‍ നല്‍കുന്ന വിശദീകരണം. ഇക്കാര്യങ്ങള്‍ പരിശോധിക്കുന്നതിന് കേന്ദ്രധനമന്ത്രാലയം റിസര്‍വ് ബാങ്ക് ഉദ്യോഗസ്ഥരുടെ അടിയന്തര യോഗം വിളിച്ചിട്ടുണ്ട്. മൂന്ന് ദിവസത്തിനകം ഇക്കാര്യം പരിഹരിക്കുമെന്നാണ് റിസര്‍വ് ബാങ്ക് വൃത്തങ്ങള്‍ നല്‍കുന്ന വിവരം. ഇക്കാര്യം പരിശോധിക്കുന്നതിനായി ഉന്നതതല സമിതിയെ നിയോഗിച്ചിട്ടുണ്ട്. കറന്‍സി ക്ഷാമം നേരിടുന്ന സ്ഥലങ്ങളിലേക്ക് കൂടുതല്‍ പണമുള്ള സ്ഥലങ്ങളില്‍ നിന്നും പണമെത്തിക്കുമെന്നും ആര്‍.ബി.ഐ വൃത്തങ്ങള്‍ അറിയിച്ചു.