മോദിയ്ക്ക് ഒരു അവസരം തരൂ; 5 വർഷം കൊണ്ട് 'സ്വർണ ബംഗാള്‍' പണിയാമെന്ന് അമിത് ഷാ

കൊൽക്കത്ത: പൗരത്വ നിയമ ഭേദഗതി നടപ്പാക്കുമെന്ന് ആവര്‍ത്തിച്ച് അമിത് ഷാ. നിയമസഭാ തെരഞ്ഞെടുപ്പിന് മുന്നോടിയായി പശ്ചിമ ബംഗാളിൽ രണ്ട് ദിവസത്തെ സന്ദര്‍ശനം പൂര്‍ത്തിയാക്കുമ്പോഴാണ് അമിത് ഷായുടെ പ്രഖ്യാപനം. പശ്ചിമ ബംഗാളിൻ്റെ അതിര്‍ത്തികള്‍ സുരക്ഷിതമല്ലെന്നും സംസ്ഥാനത്തേയ്ക്ക് നുഴഞ്ഞുകയറ്റം നടക്കുന്നുണ്ടെന്നും അമിത് ഷാ വ്യക്തമാക്കി.

എൻഡിഎ സര്‍ക്കാര്‍ 'വികസനത്തിൻ്റെ പുതിയ യുഗത്തിൽ പുതിയ ബംഗാള്‍ നിര്‍മിക്കു'മെന്നു വാഗ്ദാനം ചെയ്ത അമിത് ഷാ മുഖ്യമന്ത്രി മമത ബാനര്‍ജി അനന്തരവനെ അടുത്ത മുഖ്യമന്ത്രിയാക്കാൻ ശ്രമിക്കുകയാണെന്നും ആരോപിച്ചു. 'മോദിയുടെ നേതൃത്വത്തിന്' ഒരു അവസരം തരണമെന്ന് അമിത് ഷാ അഭ്യര്‍ഥിച്ചു.

Also Read: വീണ്ടും വോട്ടെണ്ണണമെന്ന ആവശ്യവുമായി ട്രംപ്; വിവാദ സംസ്ഥാനങ്ങളിലെ നിയമങ്ങൾ എന്തൊക്കെ ?

"അഞ്ച് വര്‍ഷം കൊണ്ട് ഞങ്ങള്‍ സ്വര്‍ണ ബംഗാള്‍ പണിയും. പശ്ചിമ ബംഗാളിൻ്റെ വികസനമാണ് ഞങ്ങളുടെ ലക്ഷ്യം" അമിത് ഷാ പറഞ്ഞു. വരുന്ന നിയമസഭാ തെരഞ്ഞെടുപ്പിൽ 200ലധികം സീറ്റുകളുമായി ബിജെപി അധികാരത്തിൽ വരുമെന്നും അമിത് ഷാ കൂട്ടിച്ചേര്‍ത്തു. "ലോക്സഭാ തെരഞ്ഞെടുപ്പിൽ ഞങ്ങളെ അനുഗ്രഹിച്ച ജനങ്ങള്‍" വീണ്ടും അനുഗ്രഹിക്കുമെന്നും അമിത് ഷാ പറഞ്ഞു.

കൊവിഡ് 19 പ്രതിരോധ പ്രവര്‍ത്തനങ്ങളിൽ മമത ബാനര്‍ജി അഴിമതി നടത്തിയെന്നും സംസ്ഥാനത്തെ രാഷ്ട്രീയ കൊലപാതകങ്ങളിൽ നടപടി സ്വീകരിച്ചില്ലെന്നും അമിത് ഷാ ആരോപിച്ചു. 2010ൽ പശ്ചിമ ബംഗാളിലെ ജനങ്ങള്‍ അധികാരത്തിലേറ്റിയ മമത ബാനര്‍ജിയുടെ ഭരണം നിരാശപ്പെടുത്തിയെന്നും അമിത് ഷാ ആരോപിച്ചു.

Also Read: ബിലീവേഴ്‌സ് ചർച്ച് ചാരിറ്റിക്കായി എത്തിച്ച പണം റിയൽ എസ്റ്റേറ്റിൽ നിക്ഷേപിച്ചു; 12 കോടിയിലധികം പിടികൂടി, 100 കോടിയിന്മേൽ അന്വേഷണം

വരുന്ന ആറുമാസത്തിനുള്ളിൽ പശ്ചിമ ബംഗാളിൽ തെരഞ്ഞെടുപ്പ് നടക്കുമെന്നാണ് പ്രതീക്ഷിക്കുന്നത്. മമത ബാനര്‍ജിയുടെ നേതൃത്വത്തിലുള്ള തൃണമൂൽ കോൺഗ്രസിനെയാണ് ബിജെപി മുഖ്യ എതിരാളിയായി കാണുന്നത്. കോൺഗ്രസ് - സിപിഎം സഖ്യവും സംസ്ഥാനത്ത് മത്സരിക്കാൻ ധാരണയായിട്ടുണ്ട്.