ശബരിമല വിഷയം: സുപ്രീംകോടതി അമിതാധികാരം പ്രയോഗിച്ചെന്ന് അറ്റോര്‍ണി ജനറല്‍

ന്യൂഡല്‍ഹി: ശബരിമല വിഷയത്തില്‍ സുപ്രീംകോടതി അമിതാധികാരം പ്രയോഗിച്ചെന്ന് അറ്റോര്‍ണി ജനറല്‍ കെ കെ വേണുഗോപാല്‍. ലോകത്തെ ഒരു സുപ്രീംകോടതിയും പ്രയോഗിക്കാത്ത വലിയ അധികാരമാണ് ഇന്ത്യയിലെ സുപ്രീംകോടതി പ്രയോഗിക്കുന്നതെന്നും കെ കെ വേണുഗോപാല്‍ പറഞ്ഞു.

കോടതി ഇടപെട്ടില്ലെങ്കിലും രാജ്യം നശിക്കില്ല. വിദ്യാഭ്യാസം ഇല്ലാത്തവര്‍ക്കുപോലും നല്ലത് ഏതാണെന്ന് തിരിച്ചറിയാന്‍ സാധിക്കും. സുപ്രീംകോടതിക്ക് ഭരണഘടനയുടെ 142-ാം അനുഛേദം നല്‍കുന്ന അധികാരം അനിയന്ത്രിതമാണെന്ന് വ്യാഖ്യാനിക്കരുതെന്നും അറ്റോര്‍ണി ജനറല്‍ വ്യക്തമാക്കി.

ശബരിമലയില്‍ സ്ത്രീകള്‍ക്ക് കയറാമെന്ന് ഭരണഘടനാ ധാര്‍മ്മികതയിലൂന്നി ഒരു വിധി പറയുന്നു. വിയോജനവിധിയും ഭരണഘടനാ ധാര്‍മ്മികതയെ തന്നെ ആശ്രയിക്കുന്നു. വലിയ മുറിവുകളുണ്ടാക്കാന്‍ ഇടയാക്കുമെന്നതിനാല്‍ ഭരണഘടനാ ധാര്‍മ്മികത അപകടകരമായ ആയുധമാണെന്നും കെ കെ വേണുഗോപാല്‍ പറഞ്ഞു.