'കൊവിഡ് പൂര്‍ണമായി സുഖപ്പെടുത്തും': മരുന്ന് പുറത്തിറക്കി പതഞ്ജലി

ഹരിദ്വാർ: ലോകമെങ്ങും അഞ്ച് ലക്ഷത്തോളം ആളുകളുടെ ജീവനെടുത്ത കൊവിഡ്-19 വൈറസ് ബാധയ്ക്കെതിരെ 100 ശതമാനം ഫലപ്രദമായ മരുന്ന് കണ്ടെത്തിയെന്ന അവകാശവാദവുമായി ബാബാ രാംദേവിൻ്റെ നേതൃത്വത്തിലുള്ള പതഞ്ജലി. കൊറോണ വൈറസിനെതിരെ പ്രവര്‍ത്തിക്കുന്ന ആദ്യ ആയുര്‍വേദ മരുന്നുകളാണ് പതഞ്ജലി പുറത്തിറക്കിയ കൊറോണിലും സ്വസാരിയും എന്നാണ് കമ്പനിയുടെ അവകാശവാദം. ചൊവ്വാഴ്ച ബാബാ രാംദേവ് തന്നെയാണ് മരുന്ന് പുറത്തിറക്കിയത്.

ക്ലിനിക്കൽ പരീക്ഷണങ്ങളിൽ പുതിയ മരുന്ന് 100 ശതമാനം ഫലപ്രാപ്തി തെളിയിച്ചെന്നാണ് കമ്പനി അവകാശപ്പെടുന്നത്. പതഞ്ചലി റിസര്‍ച്ചിൻ്റെയും നിംസിൻ്റെയും സഹകരണത്തോടെയാണ് പുതിയ മരുന്ന് വികസിപ്പിച്ചതെന്ന് കമ്പനി വ്യക്തമാക്കി. മൂന്ന് മുതൽ ഏഴു ദിവസത്തിനുള്ളിൽ രോഗം സുഖപ്പെടുമെന്നും രോഗം സുഖപ്പെടാൻ 100 ശതമാനം സാധ്യതയുണ്ടെന്നും യോഗ ഗുരു കൂടിയായ ബാബാ രാംദേവ് ഹരിദ്വാറിൽ നടത്തിയ വാര്‍ത്താ സമ്മേളനത്തിൽ വ്യക്തമാക്കി.

Also Read: സംസ്ഥാനത്ത് ഒരു കൊവിഡ് മരണം കൂടി; കൊല്ലത്ത് ചികിത്സയിലിരുന്നയാൾ മരിച്ചു

"ഞങ്ങൾ കൊവിഡ്-19നുള്ള മരുന്നുകളായ കൊറോണിലും സ്വസാരിയും ഇന്നു പുറത്തിറക്കുകയാണ്. രണ്ട് മരുന്നുകളം ക്ലിനിക്കൽ പരിശോധനയ്ക്ക് വിധേയമാക്കി. ഡൽഹിയും അഹമ്മദാബാദും ഉള്‍പ്പെടെയുള്ള നഗരങ്ങളിലെ 280 രോഗികളിലാണ് പരീക്ഷണം നടത്തിയത്. പരീക്ഷണഘട്ടത്തിൽ മരുന്ന് ഉപയോഗിച്ച എല്ലാവരും പൂര്‍ണമായി സുഖം പ്രാപിച്ചു." ബാബാ രാംദേവ് വ്യക്തമാക്കി. ക്ലിനിക്കൽ പരീക്ഷണം നടത്താനായി ബന്ധപ്പെട്ട ഏജൻസികളിൽ നിന്ന് ആവശ്യമായ അനുമതികള്‍ നേടിയിരുന്നുവെന്നും ബാബാ രാംദേവ് കൂട്ടിച്ചേര്‍ത്തു. കൊറോണ കിറ്റ് 545 രൂപയ്ക്ക് ലഭ്യമാകുമെന്ന് പതഞ്ജലി സിഇഓ ആചാര്യ ബാൽകൃഷ്ണ വ്യക്തമാക്കി. ഈ കിറ്റ് 30 ദിവസത്തെ ഉപയോഗത്തിനുള്ളതാണ്.

ആദ്യഘട്ടത്തിൽ പതഞ്ചലി സ്റ്റോറുകളിൽ മാത്രമായിരിക്കും മരുന്ന് ലഭ്യമാകുകയെന്നും കൊറോണ കിറ്റ് ലഭ്യമാക്കാനായി ഒരു ആപ്പ് പുറത്തിറക്കുമെന്നും അദ്ദേഹം കൂട്ടിച്ചേര്‍ത്തു.