സ്വദേശ് സമൃദ്ധി സിം കാര്‍ഡുകളുമായി ബാബ രാംദേവ്

ന്യൂഡല്‍ഹി: ടെലികോം രംഗത്തും ചുവടുറപ്പിക്കാൻ ബാബ രാംദേവിന്റെ പതഞ്ജലി ഗ്രൂപ്പ്. .ബിഎസ്‌എന്‍എല്ലുമായി സഹകരിച്ച്‌ സ്വദേശി സമൃദ്ധി സിം കാര്‍ഡുകള്‍ പുറത്തിറക്കിയാണ് കമ്പനിയുടെ തുടക്കം.സിം കാര്‍ഡുകളിന്മേല്‍ ഉപയോക്താക്കള്‍ക്ക് വന്‍ വാഗ്ദാനങ്ങളാണ് പതഞ്ജലി നല്‍കിയിരിക്കുന്നത്.

2 ജിബി ഡേറ്റയും പരിധിയില്ലാത്ത കോളിംഗുമാണ് ഉപയോക്താക്കള്‍ക്ക് പതഞ്ജലി വാഗ്ദാനം ചെയ്യുന്നത്. ആദ്യഘട്ടത്തില്‍ പതഞ്ജലി കമ്പനി ജീവനക്കാര്‍ക്ക് മാത്രമാണ് സ്വദേശി സമൃദ്ധി സിം കാര്‍ഡുകള്‍ ലഭ്യമാകുക. സിം കാര്‍ഡുകള്‍ പൊതുജനങ്ങള്‍ക്ക് എപ്പോള്‍ മുതലാണ് ലഭ്യമാകുക എന്ന കാര്യം കമ്പനി അറിയിച്ചിട്ടില്ല. എന്നാല്‍, മാസങ്ങള്‍ക്കകം തന്നെ ഇവ വിപണിയിലേക്കെത്തുമെന്നാണ് അനൗദ്യോഗികവിവരം. സിം കാര്‍ഡുകള്‍ പൊതുജനങ്ങളിലേക്കെത്തുന്നതോടെ പതഞ്ജലി ഉല്പന്നങ്ങളില്‍ 10 ശതമാനം കിഴിവും ഉപയോക്താക്കള്‍ക്ക് ലഭിക്കുന്നതാണെന്നാണറിയുന്നത്.

സ്വദേശി സമൃദ്ധി സിം ഉപയോക്താക്കള്‍ 144 രൂപയ്ക്കാണ് റീചാര്‍ജ് ചെയ്യേണ്ടത്. 2 ജിബി ഡേറ്റയ്ക്കും പരിധിയില്ലാത്ത കോളിങ് സൗകര്യത്തിനും പുറമേ 100 സൗജന്യ എസ്‌എംഎസുകളും സേവനത്തിന്റെ ഭാഗമായി ലഭിക്കും.