ഷമാലി: ഐശ്വര്യം വരാനായി കഴുത്തിൽ കെട്ടിയ ചരട് മുറുകി ഒരു വയസുള്ള കുട്ടി മരിച്ചു. ഉത്തർപ്രദേശിലെ ഷമാലി ജില്ലയിലാണ് നാടിനെ നടുക്കിയ ദാരുണ സംഭവം നടന്നത്. കുട്ടികളെ ഇരുത്തുന്ന പ്രാമിൽ (ഉന്തുവണ്ടി) നിന്ന് താഴെ വീണപ്പോൾ കഴുത്തിലെ ചരട് കുരുങ്ങിയാണ് ഒരു വയസുകാരൻ കൊല്ലപ്പെട്ടത്.
ഷമാലിയിലെ ഗാർഹി ഗ്രാമത്തിലാണ് സംഭവം നടന്നത്. പ്രാമിൽ ഇരുന്ന് ഉറങ്ങുകയായിരുന്ന കുട്ടിയാണ് താഴെ വീണ് മരിച്ചത്. സംഭവം നടക്കുമ്പോൾ കുട്ടിയുടെ മതാപിതാക്കൾ സമീപത്ത് ഉണ്ടായിരുന്നില്ല. ഇരുവരും ടെറസിൽ പോയ സമയത്താണ് സംഭവം നടന്നത്. ഇവർ താഴെ വന്നപ്പോൾ കഴുത്തിൽ ചരട് കുടുങ്ങി താഴേക്ക് വീണ കുട്ടിയെയായിരുന്നു കണ്ടത്.
Also Read: ബോഡോ സമാധാന കരാർ: മോദി ഇന്ന് അസമിലേക്ക്, മുൻപ് സന്ദർശനം റദ്ദാക്കിയത് രണ്ട് തവണ!
കഴുത്തിൽ ചരട് കുരുങ്ങിയ നിലയിലായിരുന്ന കുട്ടിയെ ഉടൻ തന്നെ ആശുപത്രിയിലെത്തിച്ചെങ്കിലും മരണം സ്ഥിരീകരിക്കുകയായിരുന്നു. ചെറിയ കുട്ടികൾക്ക് കണ്ണ് തട്ടാതിരിക്കാനായി കഴുത്തിൽ കറുത്ത ചരടുകൾ കെട്ടുന്നത് ഉത്തർപ്രദേശിൽ പതിവ് സംഭവമാണ്.
കുട്ടി ഉറങ്ങുകയായിരുന്നെന്നും എങ്ങിനെയാണ് താഴെ വീണതെന്നും അറിയില്ലെന്നും ഒരു വയസുകാരന്റെ അച്ഛൻ പറഞ്ഞു. കൂലിത്തൊഴിലാളിയാണ് ഇയാൾ. കഴിഞ്ഞ വര്ഷവും ഷമാലിയില് സമാനമായ സംഭവം റിപ്പോര്ട്ട് ചെയ്തിരുന്നു.