21 കിലോയുള്ള ലഡു: വില 14.65 ലക്ഷം രൂപ!

ഹൈദരാബാദ്: ഗണേശോത്സവത്തിന്‍റെ ഭാഗമായി ലേലത്തിന് വെച്ച ബലാപൂര്‍ ലഡുവിന് ലഭിച്ചത് 14.65 ലക്ഷം രൂപ. ഇരുപത്തി ഒന്ന് കിലോഗ്രാം ഭാരമുള്ള ല‍‍ഡുവിനാണ് കഴിഞ്ഞ വര്‍ഷത്തെ റെക്കോര്‍ഡ് ഭേദിച്ച് ഇത്രയും പണം ലഭിച്ചിരിക്കുന്നത്. വ്യാഴാഴ്ച്ചയാണ് ലേലം നടന്നത്.

റിയല്‍ എസ്റ്റേറ്റ് ഏജന്‍റായ കെ. സ്കൈലാബ് റെഡ്ഡിയാണ് ലഡു വാങ്ങിയത്. ആയിരത്തി നൂറ്റിപ്പതിനാറ് രൂപയ്ക്ക് ആരംഭിച്ച ലേലം വിളിഅരമണിക്കൂര്‍ കൊണ്ടാണ് ലക്ഷങ്ങളിലെത്തി ഉറപ്പിച്ചത്. 25 പേരാണ് ലേലത്തിനായി ഗണേശ ഉത്സവ സമിതിയില്‍ രജിസ്റ്റര്‍ ചെയ്തത്. കഴിഞ്ഞവര്‍ഷം 10.32 ലക്ഷം രൂപയ്ക്കാണ് ലഡു വിറ്റത്.

അടുത്ത ഇലക്ഷനില്‍ കോൺഗ്രസ്സിന്‍റെയോ ടിആര്‍എസിന്‍റേയോ സീറ്റില്‍ മത്സരിക്കാന്‍ തയ്യാറെടുക്കുന്ന സ്കൈലാബ് റെഡ്ഡി, ഗണപതിയുടെ അനുഗ്രഹത്താല്‍ താന്‍ ഉന്നത വിജയം നേടുമെന്നാണ് പറയുന്നത്. ലഡു ലേലത്തില്‍ വാങ്ങാനായത് അതിന്‍റെ മുന്നോടിയായാണെന്നും അദ്ദേഹം വിശ്വസിക്കുന്നു.

1994 ലാണ് ഇത്തരത്തില്‍ ബലാപൂര്‍ ലഡു ലേലം ചെയ്യുന്ന സമ്പ്രദായം ആരംഭിച്ചത്. ഇത്തരത്തില്‍ ലേലത്തില്‍ വാങ്ങുന്ന ലഡു ഗ്രാമീണര്‍ക്ക് വീതിച്ച് നല്‍കും. ബാക്കി വരുന്നത് പാടങ്ങളില്‍ വിതറും. ഈ ലഡുവിന് ഒൗഷധ ഗുണമുണ്ടെന്നും പാടങ്ങളില്‍ വിതറിയാല്‍ അടുത്ത കൃഷിയില്‍ നല്ല വിളവ് ലഭിക്കും എന്നാണ് വിശ്വാസം.