ബാങ്കിലേക്ക് 40 കോടി രൂപ കൊണ്ടുപോയത് തുറന്ന വാഹനത്തില്‍

തെലങ്കാനയിലെ നല്‍ഗോണ്ടയില്‍ ഒരു ബാങ്കിലേക്ക് നോട്ടുകെട്ടുകള്‍ കൊണ്ടുപോയത് തുറന്ന വാഹനത്തില്‍. ഏകദേശം 40 കോടി രൂപയാണ് ആന്ധ്രപ്രദേശ്‍ ഗ്രാമീണ വികാസ് ബാങ്ക് ഇത്തരത്തില്‍ കൈമാറിയത്. ഒരു പിക്കപ്പ് ട്രക്കില്‍ നോട്ടുകെട്ടുകള്‍ നിറച്ച് നഗരത്തിലൂടെ മൂന്ന് പോലീസുകാരുടെ അകമ്പടിയോടെയാണ് പോയത്.

അപൂര്‍വമായ സംഭവത്തിന് നഗരവാസികള്‍ സാക്ഷികളായി. എന്നാല്‍ ഇത്രയധികം അപകടം നിറഞ്ഞ ഉദ്യമം നടത്തിയതില്‍ ബാങ്കിന് കുലുക്കമില്ല. ഈ പ്രവൃത്തിയെ ബാങ്ക് ന്യായീകരിച്ചു. റയ്‍തു ബന്ധു എന്ന പേരില്‍ ആരംഭിച്ച പദ്ധതിയുടെ ഭാഗമായാണ് ഇത്രയും പണം ബാങ്കിന് കൈമാറേണ്ടിവന്നത്. കൃത്യ സമയത്ത് പണം നല്‍കാന്‍ ഇതല്ലാതെ മറ്റുമാര്‍ഗമില്ലായിരുന്നുവെന്നാണ് ബാങ്ക് അധികൃതര്‍ പറയുന്നത്.

സ്റ്റേറ്റ് ബാങ്ക് ഓഫ് ഇന്ത്യയില്‍ നിന്നാണ് പണം കൊണ്ടുവന്നതെന്ന് തെലുങ്ക് സമയം റിപ്പോര്‍ട്ട് ചെയ്‍തു.

APGVB ബാങ്കിന് മാത്രമല്ല മറ്റുപല ബാങ്കുകള്‍ക്കും പണം അനുവദിച്ചിരുന്നു. അവരെല്ലാം പണം കൈമാറാന്‍ സുരക്ഷയുള്ള വാഹനങ്ങളുമായാണ് എത്തിയത്. എന്നാല്‍ ഗ്രാമീണ വികാസ് ബാങ്കിന് സ്വന്തമായി ഇത്തരമൊരു വാഹനം ഇല്ലായിരുന്നു. അതുകൊണ്ടാണ് ടാറ്റ ഏയ്‍സ്‍ പിക്കപ്പിനെ ആശ്രയിച്ചതെന്നാണ് ബാങ്ക് നല്‍കുന്ന വിശദീകരണം.