എടിഎം ഇടപാട് നിരക്കുകള്‍ വര്‍ധിപ്പിക്കണമെന്ന് ബാങ്കുകൾ

മുംബൈ: എടിഎം പരിപാലനച്ചെലവും ഇന്‍റര്‍ബാങ്ക് ഇടപാട് ചെലവും വര്‍ധിച്ചതിനെത്തുടര്‍ന്ന് എടിഎം സേവനനിരക്കുകള്‍ വര്‍ധിപ്പിക്കാൻ അനുവദിക്കണമെന്ന് ബാങ്കുകള്‍ ആര്‍ബിഐയോട് ആവശ്യപ്പെട്ടതായി സൂചന. മറ്റു ബാങ്കുകളുകളുടെ എടിഎമ്മുകള്‍ ഉപയോഗിക്കുമ്പോള്‍ ബാങ്കുകള്‍ തമ്മിൽ നല്‍കുന്ന നിരക്ക് വര്‍ധിപ്പിക്കണമെന്നും ആവശ്യമുയര്‍ന്നിട്ടുണ്ട്.

നോട്ട് അസാധുവാക്കലിനുശേഷം എടിഎം ഇടപാടുകള്‍ കുറഞ്ഞതോടെ പരിപാലനച്ചെലവ് കൂടിയെന്നാണ് ബാങ്കുകളുടെ വാദം.പൊതുമേഖലയിലെയും സ്വകാര്യമേഖലയിലെയും ബാങ്കുകളുമായി ചര്‍ച്ച ചെയ്ത ശേഷം പെയ്‍‍മെന്‍റ് കോര്‍പ്പറേഷന്‍ ഓഫ് ഇന്ത്യയാണ് നിരക്കുവര്‍ധന സംബന്ധിച്ച് റിസര്‍വ് ബാങ്കിനെ സമീപിച്ചിരിക്കുന്നത്.

അതേസമയം, വൻകിട പൊതുമേഖലാ ബാങ്കുകള്‍ ഈ നീക്കത്തിനെതിരെ രംഗത്തെത്തിയതായും സൂചനയുണ്ട്. നടപടി കനത്ത ബാധ്യത വരുത്തിവെക്കുമെന്നാണ് ഇവരുടെ വാദം.

എടിഎമ്മുകളിൽ സുരക്ഷാ സംവിധാനം ഒരുക്കുന്നതിനും നോട്ട് അസാധുവാക്കലിനു ശേഷം നിലവിൽ വന്ന പുതിയ വലുപ്പത്തിലുള്ള നോട്ടുകള്‍ നിക്ഷേപിക്കുന്നതിനുമായി വൻ തുക ചെലവാക്കേണ്ടി വന്നെന്ന് ബാങ്കുകള്‍ പറയുന്നു.