പ്ലാസ്റ്റിക് ബാഗ് കൈവശമുണ്ടായാൽ 500 രൂപ പിഴ

ബംഗളൂരുവിൽ പ്ലാസ്റ്റിക് കാരി ബാഗ് വില്‍ക്കുന്നവര്‍ക്കും, വാങ്ങുന്നവ‍ർക്കും കൊണ്ടുനടക്കുന്നവര്‍ക്കും ഇനി പിഴ. ഐ ടി നഗരമായ ബംഗളൂരുവിൽ 40 മൈക്രോണ്‍സില്‍ താഴെയുള്ള പ്ലാസ്റ്റിക് കാരി ബാഗുകൾ നിരോധിച്ചിട്ടുണ്ട്. നിരോധനമുണ്ടെങ്കിലും കാരി ബാഗുകള്‍ ആവശ്യം പോലെ വാങ്ങാൻ കിട്ടും. നിരോധിത പ്ലാസ്റ്റിക് ബാഗ് വില്‍ക്കുന്നവരും, വാങ്ങുന്നവ‍രും ഇനി പിഴ നൽകേണ്ടിവരും.

500 രൂപയാണ് പ്ലാസ്റ്റിക് കാരിബാഗ് കൈവശം വെച്ചാല്‍ ഇനി പിഴയടക്കേണ്ടിവരിക. കുറ്റം ആവര്‍ത്തിച്ചാല്‍ പിഴ ആയിരം രൂപയാകും. മെയ് നാലാം തീയതി എന്‍ മഞ്ജുനാഥ പ്രസാദ് സിവിക് കമ്മീഷണറായി സ്ഥാനമേറ്റ ശേഷം ബി ബി എം പി എടുത്ത ആദ്യത്തെ ന തീരുമാനമാണിത്.

പ്ലാസ്റ്റിക് ബാഗുകള്‍ ഉണ്ടാക്കുന്നവര്‍ക്ക് പിഴ 5 ലക്ഷം രൂപ വരെയാണ്. നാലായിരം മെട്രിക് ടണ്‍ ഖരമാലിന്യമാണ് ബെംഗളൂരു ഒരു ദിവസം ഉണ്ടാക്കുന്നത്. ഇതില്‍ 350 - 400 ടണ്‍ പ്ലാസ്റ്റിക് മാലിന്യമാണ്.

2015 ജനുവരിയിലാണ് ഐ ടി നഗരമായ ബെംഗളൂരുവിനെ പ്ലാസ്റ്റിക് ഫ്രീ ആക്കുമെന്ന് സിദ്ധരാമയ്യ പ്രഖ്യാപിച്ചത്. എന്നാല്‍ നിയന്ത്രണങ്ങളും നിയമങ്ങളും നിരോധനങ്ങളും കൊണ്ടുവന്നിട്ടും നഗരത്തില്‍ പ്ലാസ്റ്റിക് ഉപയോഗം കുറഞ്ഞിരുന്നില്ല.