ഹൗഡിനി മാജിക് അവതരിപ്പിക്കുന്നതിനിടെ മജീഷ്യനെ കാണാതായി

കൊൽക്കത്ത: ഹൗഡിനി മാജിക് കാണിക്കുന്നതിനിടെ മജീഷ്യൻ കാണാതായി. പശ്ചിമബംഗാളിലെ സൊനാര്‍പൂര്‍ സ്വദേശിയായ ചഞ്ചല്‍ സര്‍ക്കാര്‍ എന്ന മജീഷ്യനെയാണ് കാണാതായത്. 42 വയസായിരുന്നു ചഞ്ചലിന്. കൈ കാലുകൾ ബന്ധിച്ച് നദിയിൽ ചാടിയ ശേഷം രക്ഷപെടുന്നതാണ് ഹൗഡിനി മാജിക്.

ഈ ജാലവിദ്യ ആദ്യമായി അവതരിപ്പിച്ച ഹാരി ഹൗഡിനിയുടെ കടുത്ത ആരാധകനായിരുന്നു ചഞ്ചല്‍ സര്‍ക്കാര്‍. ഇന്നലെ ഉച്ചക്ക് കൊൽക്കത്തയിലെ പ്രശസ്തമായ ഹൂഗ്ലി നദിക്ക് കുറുകെയുള്ള ഹൗറ പാലത്തിൽ നിന്നാണ് ചഞ്ചൽ നദിയിലേക്ക് ചാടിയത്.

നിരവധി കാഴ്ചക്കാർ നോക്കി നിൽക്കെയാണ് ചഞ്ചൽ നദിയിലേക്ക് ചാടിയത്. പാലത്തിന് മുകളിൽ നിന്ന കാഴ്ചക്കാർ തന്നെയാണ് മജീഷ്യനെ കാണാനില്ലെന്ന് പോലീസിൽ പരാതി നൽകിയത്. പോലീസ് സംഭവസ്ഥലത്ത് തെരച്ചിൽ നടത്തിയെങ്കിലും ചാഞ്ചൽ സർക്കാരിനെ കണ്ടെത്താനായില്ല.