നായ്ക്കുട്ടികളോട് കൊടും ക്രൂരത: സ്ത്രീക്കെതിരെ കേസ്

ബംഗളുരു: തെരുവുപട്ടിയെ പാഠം പഠിപ്പിക്കാനായി നായ്ക്കുട്ടികളെ കൊന്ന വീട്ടമ്മക്കെതിരെ കേസ്. ബംഗളുരുവിലെ കൃഷ്ണനഗറിലാണ് സംഭവം. തന്‍റെ വീടിന്‍റെ ഗേറ്റിനടുത്ത് പ്രസവിച്ച ​പട്ടിയുടെ എട്ട് കുഞ്ഞുങ്ങളെയാണ് പൊന്നമ്മ എന്ന സ്ത്രീ സമീപത്തുള്ള പാറയിൽ വലിച്ചെറിഞ്ഞ് കൊന്നത്. ​വീടിന് സമീപം നായ് പ്രസവിച്ചതിലുള്ള ദേഷ്യം തീർക്കുകയായിരുന്നു ഇവർ.

നിരവധി വിമുക്തഭടന്മാർ താമസിക്കുന്ന പ്രദേശമാണിത്. സംഭവത്തോടെ കോപാകുലരായ നാട്ടുകാർ നായ്ക്കുട്ടികളെ കുഴിച്ചിട്ട ശേഷം കേസ് ഫയൽ ചെയ്യുകയായിരുന്നു. അമ്മു എന്ന് വിളിക്കുന്ന തെരുവുപട്ടിയുടെ കുഞ്ഞുങ്ങളെയാണ് പൊന്നമ്മ കൊന്നത്. എന്നാൽ കുഞ്ഞുങ്ങൾ മരിച്ചതറിയാതെ പാലൂട്ടാനായി അമ്മു നായ്ക്കുട്ടികളെ പലതിനേയും കുഴി മാന്തി പുറത്തെടുത്തു. കുഞ്ഞുങ്ങളെ കുഴിച്ചിട്ട സ്ഥലം ചുറ്റിപ്പറ്റി കഴിഞ്ഞ അഞ്ച് ദിവസമായി നടക്കുകയാണ് അമ്മു. അമ്മപ്പട്ടിയുടെ സങ്കടം കണ്ട് നാട്ടുകാരുടെയും ഹൃദയം ഉരുകുകയാണ്.

മൃഗങ്ങൾക്കെതിരായ ക്രൂരത തടയുന്ന നിയമപ്രകാരമാണ് പൊന്നമ്മക്കെതിരെ പോലീസ് കേസെടുത്തത്. കുറ്റവാളിയെന്ന് തെളിഞ്ഞാൽ ഇവർക്ക് അഞ്ച് വ‍ർഷം വരെ തടവ് ലഭിക്കാം.