'ഹംരോ സിക്കിം' ബൈച്ചുങ് ബൂട്ടിയയുടെ രാഷ്ട്രീയ പാര്‍ട്ടി

ന്യൂഡല്‍ഹി: മുന്‍ ഇന്ത്യന്‍ ഫുട്‌ബോള്‍ നായകന്‍ ബൈച്ചുങ് ബൂട്ടിയ പുതിയ രാഷ്ട്രീയ പാര്‍ട്ടി പ്രഖ്യാപിച്ചു. വാര്‍ത്താ സമ്മേളനത്തിനിടെയാണ് ഹംരോ സിക്കിം എന്ന രാഷ്ട്രീയ പാര്‍ട്ടിയുടെ പ്രഖ്യാപനം നടന്നത്. പാര്‍ട്ടി സിക്കിമിലെ ജനതയ്ക്ക് സമര്‍പ്പിക്കുന്നുവെന്ന് പറഞ്ഞ ബൂട്ടിയ യുവജനങ്ങള്‍ക്കായിരിക്കും ഹംരോ സിക്കിം പ്രാധാന്യം നല്‍കുകയെന്നും വ്യക്തമാക്കി. പാര്‍ട്ടിയില്‍ പുതിയ തീരുമാനം എടുക്കുന്നതില്‍ എല്ലാവരേയും ഉള്‍പ്പെടുത്തുമെന്ന് താന്‍ ഉറപ്പു നല്‍കുന്നുവെന്നും ബൂട്ടിയ കൂട്ടിച്ചേര്‍ത്തു.

കഴിഞ്ഞ ഫെബ്രുവരിയിലാണ് തൃണമൂല്‍ കോണ്‍ഗ്രസില്‍ നിന്ന് മുന്‍ ഫുട്‌ബോള്‍ താരം രാജിവെച്ചത്. പ്രൊഫഷണല്‍ ഫുട്‌ബോളില്‍ നിന്ന് വിരമിച്ചതിനു ശേഷം രണ്ടു വര്‍ഷത്തെ ഇടവേളയ്ക്കും ശേഷം 2013ലാണ് ബൂട്ടിയ മമത ബാനര്‍ജിയുടെ തൃണമുല്‍ കോണ്‍ഗ്രസില്‍ ചേർന്നത്. സിക്കിമില്‍ രാഷ്ട്രീയ നേട്ടങ്ങള്‍ക്കു വേണ്ടിയാണ് ബൂട്ടിയ തൃണമൂല്‍ കോണ്‍ഗ്രസ് വിട്ടതെന്ന് വിമര്‍ശനങ്ങളുയര്‍ന്നിരുന്നു. 2014 ല്‍ ലോക്‌സഭാ തിരഞ്ഞെടുപ്പില്‍ ഡാര്‍ജിലിങ്ങില്‍ നിന്നു മത്സരിച്ച ബൂട്ടിയ കേന്ദ്രമന്ത്രിയും എംപിയുമായ എസ്.എസ് അലുവാലിയയോട് പരാജയപ്പെട്ടിരുന്നു.