പച്ചക്കറികൾക്ക് വിൽപന വില നിശ്ചയിക്കണം: ഭാരതീയ കിസാൻ സംഘ്

ന്യൂഡൽഹി: ഭക്ഷ്യ വിളകൾക്കും പച്ചക്കറികൾക്കും പരമാവധി വിൽപന വില നിശ്ചയിക്കണമെന്ന് ആർഎസ്എസ് കർഷകസംഘടനയായ ഭാരതീയ കിസാൻ സംഘ്. 2019 ൽ നടക്കുന്ന ലോക്‌സഭാ തെരഞ്ഞെടുപ്പിന് മുൻപുള്ള അവസാന ബജറ്റ് സമ്മേളനത്തിന് കേന്ദ്രസർക്കാർ ഒരുങ്ങുന്നതിനിടെയാണ് സംഘടനയുടെ പ്രസ്‌താവന.

വിപണിയിൽ തക്കാളിക്ക് 30 രൂപ ലഭിക്കുമ്പോൾ കർഷകന് ലഭിക്കുന്നത് വെറും അഞ്ച് രൂപയാണ്. പരമാവധി വില നൽകിയാണ് കർഷകർ അസംസ്‍കൃത വസ്തുക്കൾ കൃഷിക്കായി വാങ്ങുന്നത്. എന്നാൽ വിൽപന നടക്കുന്നത് ഏറ്റവും കുറഞ്ഞ വിലക്കും. ഈ സ്ഥിതി മാറണമെന്ന് ഭാരതീയ കിസാന്‍ സംഘ് ദേശീയ സെക്രട്ടറി മോഹിനി മോഹന്‍ മിശ്ര പറഞ്ഞു. കാർഷിക വിളകളുടെ താങ്ങു വില കൂട്ടുമെന്നത് സർക്കാരിന്‍റെ തെരഞ്ഞെടുപ്പ് തന്ത്രം മാത്രമാണെന്നും സംഘ് കുറ്റപ്പെടുത്തി.