രാജ്യത്ത് അച്ഛേ ദിന്‍ യാഥാര്‍ത്ഥ്യമായെന്ന് ബിജെപി

ന്യൂഡല്‍ഹി: രാജ്യത്ത് അച്ഛേ ദിന്‍ യാഥാര്‍ത്ഥ്യമായിക്കഴിഞ്ഞെന്ന അവകാശവാദവുമായി ബിജെപി രംഗത്ത്. ലോകബാങ്കിന്‍റെ മുന്‍ഗണനാ പട്ടികയില്‍ ഇന്ത്യയുടെ നിലവാരം ഉയര്‍ന്നതുമായി ബന്ധപ്പെട്ടുള്ള റിപ്പോര്‍ട്ടുകളുടെ അടിസ്ഥാനത്തിലാണ് ബിജെപി അവകാശവാദമുന്നയിക്കുന്നത്. ഇന്ത്യയുടെ സാമ്പത്തികരംഗത്ത് അച്ഛേ ദിന്‍ എത്തിക്കഴിഞ്ഞതായി ബിജെപി വക്താവ് സാംബിത് പത്ര പറഞ്ഞു.

രാജ്യത്തെ പരിഷ്കരണത്തിലേക്കും പുരോഗതിയിലേക്കും നയിച്ചതില്‍ പ്രധാനമന്ത്രി നരേന്ദ്രമോദിയുടെ പങ്ക് സുപ്രധാനമാണ്. ഇതിന് പ്രധാനമന്ത്രിക്ക് നന്ദി പറയുന്നതായും സാംബിത് പത്ര കൂട്ടിച്ചേര്‍ത്തു.

സുഗമമായി വ്യാപാര-വ്യവസായ സ്ഥാപനങ്ങള്‍ നടത്തിക്കൊണ്ടുപോകാന്‍ കഴിയുന്ന രാജ്യമായി ഇന്ത്യ മാറി. ഇത്തരം രാജ്യങ്ങളുടെ പട്ടികയില്‍ ഇന്ത്യ മുന്‍നിരയിലേക്ക് കുതിച്ചിരിക്കുകയാണ്. ബിജെപി സര്‍ക്കാരിന്‍റെ സുവ്യക്തമായ നയനിലപാടുകളാണ് ഈ നേട്ടത്തിന് കാരണമെന്നും അദ്ദേഹം അവകാശപ്പെട്ടു.