ആപ്പ്ജില്ല

കർണാടകത്തിൽ ബിജെപി ലക്ഷ്യം രാഷ്‌ട്രപതി ഭരണം: കോൺഗ്രസ്

കർണാടക നിയമസഭയിൽ ഇന്നും വിശ്വാസവോട്ടെടുപ്പ് നടക്കാനുള്ള സാധ്യത മങ്ങുന്നു. വിശ്വാസപ്രമേയത്തിന്മേലുള്ള ചർച്ച പൂർത്തിയാക്കിയ ശേഷം മാത്രമേ വോട്ടെടുപ്പിലേക്ക് കടക്കൂ എന്ന നിലപാട് കടുപ്പിച്ച് സ്‌പീക്കർ.

Samayam Malayalam 19 Jul 2019, 12:57 pm
ബെംഗലൂരു: കർണാടക നിയമസഭയിൽ ഇന്ന് വീണ്ടും നടപടിക്രമങ്ങൾ ആരംഭിച്ചു. ഇന്നലെ മുഖ്യമന്ത്രി കുമാരസ്വാമി അവതരിപ്പിച്ച വിശ്വാസപ്രമേയത്തിന്മേലുള്ള ചർച്ചയോടെ സഭാ നടപടികൾ പുനരാരംഭിച്ചത്. ഇന്ന് ഉച്ചക്ക് ഒന്നരക്ക് മുൻപ് വിശ്വാസവോട്ടെടുപ്പ് പൂർത്തിയാക്കണമെന്നാണ് ഗവർണർ നൽകിയിരിക്കുന്ന നിർദേശം. എന്നാൽ വിശ്വാസപ്രമേയ ചർച്ചക്ക് ശേഷം മാത്രമേ വോട്ടെടുപ്പിലേക്ക് പോകൂ എന്ന നിലപാടിൽ ഉറച്ചു നിൽക്കുകയാണ് മുഖ്യമന്ത്രിയും സ്‌പീക്കറും.
Samayam Malayalam Karnataka Floor Test


കർണാടക ഗവർണർ വാജുഭായ് വാല ചട്ടങ്ങൾ ലംഘിച്ചെന്ന് എഐസിസി ജനറൽ സെക്രട്ടറി കെ.സി വേണുഗോപാൽ വ്യക്തമാക്കി. വിശ്വാസവോട്ടെടുപ്പ് പൂർത്തിയാക്കാതെ സഭ വിടില്ലെന്ന നിലപാടിൽ ഉറച്ചു നിന്ന ബിജെപി അംഗങ്ങൾ കഴിഞ്ഞ രാത്രിയിൽ കർണാടക നിയമസഭയിൽ തന്നെയാണ് കഴിച്ചു കൂട്ടിയത്. വിമത എംഎൽഎമാർ ഉൾപ്പടെ 20 പേർ ഇന്നും സഭയിൽ എത്തിയിട്ടില്ല. അതിനിടെ, മുഖ്യമന്ത്രി കുമാരസ്വാമി ബിജെപിക്ക് ശക്തമായ മറുപടി നൽകി.

വിശ്വാസവോട്ട് ഇന്ന് തേടണമെന്ന് ഗവര്‍ണറുടെ അന്ത്യശാസനം; കര്‍'നാടകം ക്ലൈമാക്സ് കാത്ത് രാജ്യം

നിങ്ങൾക്ക് ഇന്നോ നാളെയോ സർക്കാറുണ്ടാക്കാം, എന്നാൽ അത് ഈ ചർച്ചക്ക് ശേഷം മാത്രമെന്ന് കുമാരസ്വാമി വ്യക്തമാക്കി. വിശ്വാസവോട്ട് ഇന്ന് നടത്തുന്നതിനെ കുറിച്ച് സഭയിൽ ഇത് വരെ പരാമർശമൊന്നുമില്ല. സർക്കാരിനെ പിരിച്ചുവിട്ട് രാഷ്‌ട്രപതി ഭരണം ഏർപ്പെടുത്തുന്നതിനുള്ള ഗൂഢനീക്കമാണ് ഇപ്പോൾ നടക്കുന്നതെന്ന് കോൺഗ്രസ് ആരോപിച്ചു. അതിനിടെ ഗവർണർ നൽകിയ നിർദേശത്തെ ചോദ്യം ചെയ്ത് കോൺഗ്രസ് സുപ്രീം കോടതിയെ സമീപിച്ചു.

മുതിർന്ന അഭിഭാഷകൻ മനു അഭിഷേക് സിംഘ്‌വിയാണ് കോൺഗ്രസിന് വേണ്ടി ഹാജരാകുന്നത്. കർണാടക ഗവർണർ ഭരണഘടനാ വിരുദ്ധമായി ഇടപെടുന്നുവെന്നാണ് കോൺഗ്രസ് ഉന്നയിച്ച പ്രധാന ആരോപണം. ഗവർണർ അധികാര ദുർവിനിയോഗം നടത്തിയെന്ന് കാണിച്ച് കോൺഗ്രസ് പാർലമെന്റിൽ അടിയന്തര പ്രമേയ നോട്ടീസ് നൽകി.ഈ പദവിയിൽ തന്നെ തുടരണമെന്ന് നിർബന്ധമില്ലെന്ന് കുമാരസ്വാമി നിയമസഭയിൽ പറഞ്ഞു.

കര്‍ണാടകത്തില്‍ വിശ്വാസ വോട്ടെടുപ്പ് നടന്നില്ല; ഗവര്‍ണര്‍ ഇടപെട്ടു

ഗവർണർ ബിജെപിയുടെ ഏജന്റായി പ്രവർത്തിക്കുന്നുവെന്ന് കെ.സി വേണുഗോപാൽ ആരോപിച്ചു. എംഎൽഎമാർക്ക് വിപ്പ് ബാധകമാക്കാൻ കഴിയുന്ന സാഹചര്യത്തിലേക്ക് കാര്യങ്ങൾ എത്തിക്കാനാണ് കോൺഗ്രസ് ശ്രമം. ബിജെപി തങ്ങളുടെ എംഎല്‍എമാരെ തട്ടിക്കൊണ്ടുപോയെന്ന ആരോപണം ഭരണകക്ഷി എംഎല്‍എമാര്‍ സഭയിൽ ഉയർത്തിയിരുന്നു. കോൺഗ്രസിൻ്റെ ആരോപണത്തിൽ പോലീസ് എംഎൽഎയായ ശ്രീമന്ത് പാട്ടീലിൻ്റെ മൊഴിയെടുത്തു. പാട്ടീലിനെ കാണാനില്ലെന്നും അന്വേഷണം നടത്തണമെന്നും സ്പീക്കർ ആഭ്യന്തരമന്ത്രിക്ക് നൽകിയ നിർദേശപ്രകാരമായിരുന്നു നടപടി.

വിപ്പ് സംബന്ധിച്ച് വ്യക്തത തേടാനും കോൺഗ്രസ് ഇന്ന് സുപ്രീംകോടതിയെ സമീപിക്കും. വിപ്പ് നൽകുന്നതിൽ വ്യക്തത വന്നിട്ട് വിശ്വാസവോട്ടെടുപ്പ് മതിയെന്നാണ് കോൺഗ്രസിൻ്റെ നിലപാട്. നേരത്തെ 15 എംഎല്‍എമാര്‍ സമര്‍പ്പിച്ച രാജിക്കത്തിൽ തീരുമാനം എടുക്കാൻ സ്‍പീക്കര്‍ക്ക് സുപ്രീംകോടതി സമയം അനുവദിച്ചിരുന്നു. അതേസമയം രാജിക്കത്ത് നല്‍കിയ വിമത കോണ്‍ഗ്രസ്-ജെഡിഎസ്‍ എംഎല്‍എമാര്‍ മുംബൈയിലെ റിസോര്‍ട്ടില്‍ തന്നെ തുടരുകയാണ്.

കർണാടക: എംഎൽഎയെ തട്ടിക്കൊണ്ടു പോയത് ബിജെപിയെന്ന് കോൺഗ്രസ്

'സഖ്യസർക്കാരിനെ താഴെയിറക്കുമെന്ന് പ്രധാനമന്ത്രി നരേന്ദ്ര മോദി തന്നെ പറഞ്ഞിട്ടുണ്ട്. കുതിരക്കച്ചവടമാണ് ബിജെപി നടത്തുന്നതെന്നും ഇതിന് പിന്നിലെ ഗൂഢാലോചന പുറത്ത് കൊണ്ട് വരണം' കുമാരസ്വാമി നിയമസഭയിൽ പറഞ്ഞു. സുപ്രീം കോടതി വിധിയിലെ അവ്യക്തത മാറുന്നത് വരെ വിശ്വാസവോട്ടെടുപ്പ് നടത്താൻ കഴിയില്ലെന്ന് മുൻ മുഖ്യമന്ത്രി സിദ്ധരാമയ്യയും വ്യക്തമാക്കി. അർധരാത്രിയായാലും വിശ്വാസവോട്ടെടുപ്പ് ഇന്നലെ തന്നെ നടത്തണമെന്നായിരുന്നു ബി എസ് യെദിയൂരപ്പയുടെ ആവശ്യം. ഗവര്‍ണറുടെ നിര്‍ദേശം അംഗീകരിക്കണമെന്നും വോട്ടെടുപ്പ് നടന്നില്ലെങ്കില്‍ ഭരണഘടനാ പ്രതിസന്ധിയുണ്ടാകുമെന്നുമാണ് കേന്ദ്രസര്‍ക്കാര്‍ വാദം.

ആര്‍ട്ടിക്കിള്‍ ഷോ

ട്രെൻഡിങ്