ബിഹാർ തെരഞ്ഞെടുപ്പ്: ബിജെപിയുടെ പ്രചാരണ ചുമതല ദേവേന്ദ്ര ഫഡ്നാവിസിന്

ന്യൂഡൽഹി: ബിഹാർ തെരഞ്ഞെടുപ്പിൽ ബിജെപിയുടെ പ്രചാരണ ചുമതല മുൻ മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസിന്. ബിജെപി ദേശീയ അധ്യക്ഷൻ ജെപി നഡ്ഡയാണ് ഇക്കാര്യം അറിയിച്ചത്. 243 മണ്ഡലങ്ങളിലേക്കായി ഒക്ടോബർ 28, നവമ്പർ മൂന്ന്, ഏഴ് തിയ്യതികളിലാണ് തെരഞ്ഞെടുപ്പ് നടക്കുന്നത്.

കഴിഞ്ഞ കുറച്ച് ആഴ്ചകളായി ബിഹാർ തെരഞ്ഞെടുപ്പുമായി ബന്ധപ്പെട്ട പാർട്ടി യോഗങ്ങളിൽ ഫഡ്നാവിസ് പങ്കെടുക്കുന്നുണ്ട്. കൂടാതെ പലപ്പോഴായി സംസ്ഥാനം സന്ദർശിക്കുകയും ചെയ്തിരുന്നു. മുതിർന്ന നേതാക്കളെ സംസ്ഥാനങ്ങളുടെ തെരഞ്ഞെടുപ്പിന് ചുമതല വഹിക്കാൻ ഏൽപ്പിക്കുന്ന കീഴ്വഴക്കം ബിജെപിക്കുണ്ട്.

Also Read: അൺലോക്ക് 5: രാജ്യത്തെ തിയേറ്ററുകൾ തുറക്കുന്നു, സ്‌കൂളുകളും കോളേജുകളും തുറക്കുന്നതിലും തീരുമാനം

നവംബർ 10 നാണ് വോട്ടെണ്ണൽ. കൊവിഡ് വ്യാപനത്തിന്റെ പശ്ചാത്തലത്തിൽ മാനദണ്ഡങ്ങൾ പാലിച്ചായിരിക്കും വോട്ടെണ്ണൽ നടക്കുക. 80 വയസിനു മുകളിലുള്ളവർക്ക് തപാൽ മാർഗമാണ് വോട്ട്. ക്വാറന്റൈനിൽ ഉള്ളവർക്കും കൊവിഡ് രോഗികൾക്കും അവസാന ഒരു മണിക്കൂറിൽ വോട്ട് ചെയ്യാം. രാവിലെ ഏഴ് മുതൽ വൈകിട്ട് ആറ് വരെയാണ് പോളിങ്. അതേസമയം എൻഡിഎ സഖ്യത്തിൽ സീറ്റ് വിഭജനം സംബന്ധിച്ച തർക്കം തുടരുകയാണ്. ഈ ഘട്ടത്തിലാണ് ദേവേന്ദ്ര ഫഡ്നാവിസിനെ ബിജെപി രംഗത്തിറക്കിയിരിക്കുന്നത്.

ബോളിവുഡ് നടൻ സുശാന്ത് സിങ് രജ്പുതിന്റെ മരണമാണ് ബിഹാറിൽ ചർച്ച. മുംബൈ പോലീസ് കേസ് കൈകാര്യം ചെയ്ത രീതിക്കെതിരെ ഫഡ്നാവിസ് രംഗത്തെത്തിയിരുന്നു. ഇതേത്തുടർന്നാണ് തെരഞ്ഞെടുപ്പിന്റെ ചുമതല ഫഡ്നാവിസിന് നൽകിയതെന്നാണ് റിപ്പോർട്ടുകൾ വ്യക്തമാക്കുന്നത്.