തൃപുരയിൽ സോഷ്യൽ മീഡിയയിലും ബിജെപിയോട് തോറ്റ് സിപിഎം

അഗർത്തല: തൃപുരയിൽ രണ്ട് പതിറ്റാണ്ടിലധികം നീണ്ടു നിന്ന സിപിഎമ്മിൻെറ ഭരണത്തിന് അന്ത്യം കുറിച്ചിരിക്കുകയാണ് ബിജെപി. എണ്ണയിട്ട യന്ത്രം പോലെ പ്രവർത്തിച്ച പാർട്ടി നേതൃത്വവും ഉറച്ച പിന്തുണയുമായി അണി നിരന്ന അണികളും ബിജെപിക്ക് വിജയം നൽകിയതിൽ നിർണായക പങ്ക് വഹിച്ചു.

എന്നാൽ പുതിയ കാലത്തെ രാഷ്ട്രീയത്തിൽ ബിജെപി ഏറ്റവും നന്നായി കൈകാര്യം ചെയ്യുന്ന സോഷ്യൽ മീഡിയ അവരെ സിപിഎമ്മിനേക്കാൾ ബഹുദൂരം മുന്നിലെത്തിച്ചു. തൃപുരയിൽ ശക്തമായ സ്വാധീനമുള്ള ഭരണകക്ഷിയായ സിപിഎമ്മിൻെറ ഒഫീഷ്യൽ ഫേസ്ബുക്ക് പേജിന് വെറും 52000ലധികം ലൈക്കാണുള്ളത്.

എന്നാൽ കഴിഞ്ഞ തെരഞ്ഞെടുപ്പ് വരെ ചിത്രത്തിൽ തന്നെ ഇല്ലാതിരുന്ന ബിജെപിയുടെ എഫ്.ബി പേജിന്
214000ത്തിലധികം ലൈക്കുകളുണ്ട്. വളരെ കുറഞ്ഞ കാലം കൊണ്ടാണ് ബിജെപി സോഷ്യൽ മീഡിയയിൽ വൻ മുന്നേറ്റം ഉണ്ടാക്കിയത്.

ഇരുപതിനായിരത്തിലധികം ഫോളോവേഴ‍്‍സ് ഉള്ള ഒഫീഷ്യൽ ട്വിറ്റർ അക്കൗണ്ടിലും ബിജെപി ബഹുദൂരം മുന്നിലെത്തി. പുതിയ കാലത്തെ തെരഞ്ഞെടുപ്പ് തന്ത്രങ്ങളിലെ പാകപ്പിഴകൾ കൂടിയാണ് തൃപുരയിൽ സിപിഎം തോൽക്കാൻ പ്രധാന കാരണമായത്.