കനയ്യയ്ക്കെതിരായ പരാമർശം: യുവമോർച്ച പ്രവർത്തകനെ പുറത്താക്കി

ന്യൂഡൽഹി: ജെ.എന്‍.യു സ്റ്റുഡന്റ്‌സ് യൂണിയന്‍ പ്രസിഡന്റ് കനയ്യ കുമാറിന്‍റെ നാവ് പിഴുതെറിയുന്നവർക്ക് അഞ്ച് ലക്ഷം രൂപ വാഗ്ദാനം ചെയ്ത് ഭാരതീയ ജനത യുവമോർച്ച(ബി.ജെ.വൈ.എം) നേതാവിനെ യുവമോർച്ച പുറത്താക്കി. ഉത്തർപ്രദേശിലെ ബദൂൻ ജില്ലയിലെ ബി.ജെ.വൈ.എം നേതാവാണ് കുൽദീപ് വാഷ്നേയ്.

അതേസമയം കനയ്യകുമാറിനെ വധിക്കുന്നവര്‍ക്ക് 11ലക്ഷം രൂപ പാരിതോഷികമായി പ്രഖ്യാപിച്ച് ചില പോസ്റ്ററുകളും പ്രത്യക്ഷപ്പെട്ടു . പ്രസ് ക്ലബ് ഓഫ് ഇന്ത്യ, നാഷണല്‍ മീഡിയ സെന്റര്‍ തുടങ്ങി ‍ ഡൽഹിയിലെ വിവിധയിടങ്ങളിലാണ് പോസ്റ്റര്‍ പ0തിച്ചിരിക്കുന്നത്. സംഘപരിവാറുമായി അടുത്തബന്ധമുള്ള സംഘടനയായ പൂര്‍വാഞ്ചല്‍ സേനയുടെ പേരിലാണ് പോസ്റ്റര്‍ വന്നിരിക്കുന്നത്.

കൊലപാതകം നടത്തിയാല്‍ പോലീസ് കേസൊന്നുമില്ലാതെ രക്ഷപ്പെടാന്‍ സഹായിക്കുമെന്നും പോസ്റ്ററില്‍ പറയുന്നുണ്ട്. ഇന്ന് രാവിലെയാണ് പോസ്റ്റര്‍ പ്രത്യക്ഷപ്പെട്ടത്.

പോസ്റ്റര്‍ പ്രത്യക്ഷപ്പെട്ട സാഹചര്യത്തില്‍ ‍ഡല്‍ഹി പോലീസ് കനയ്യകുമാറിന്റെ സുരക്ഷശക്തമാക്കി. കനയ്യയെ സന്ദര്‍ശിക്കാന്‍ എത്തുന്നവരുടെ വിവരങ്ങള്‍ കൈമാറണമെന്ന് പോലീസ് സര്‍വ്വകലാശാലയോട് ആവശ്യപ്പെട്ടിട്ടുണ്ട്.

രാജ്യദ്രോഹക്കുറ്റം ആരോപിച്ച് ‍ഡല്‍ഹി പോലീസ് അറസ്റ്റു ചെയ്ത കനയ്യകുമാര്‍ കഴിഞ്ഞദിവസമാണ് ജാമ്യത്തിലിറങ്ങിയത്. കഴിഞ്ഞദിവസം ജെ.എന്‍.യുവിലെത്തി കനയ്യ വിദ്യാര്‍ത്ഥികളെ അഭിസംബോധന ചെയ്യവെ സംഘപരിവാറിനെയും മോദി സര്‍ക്കാറിനെയും രൂക്ഷമായി വിമര്‍ശിച്ചിരുന്നു.