നോട്ടുകളില്‍ ലക്ഷ്മി ദേവിയുടെ ചിത്രം ഉള്‍പ്പെടുത്തൂ, രൂപയുടെ തകര്‍ച്ച ഇല്ലാതാക്കാം; സുബ്രഹ്മണ്യന്‍ സ്വാമി

കണ്ട്വ: ഇന്ത്യന്‍ കറന്‍സിയില്‍ ലക്ഷ്മി ദേവിയുടെ ചിത്രം ഉള്‍പ്പെടുത്തിയാല്‍ രൂപയുടെ തകര്‍ച്ച ഇല്ലാതാക്കാമെന്ന് ബിജെപി നേതാവും രാജ്യസഭാ എം പിയുമായ സുബ്രഹ്മണ്യന്‍ സ്വാമി. മധ്യപ്രദേശിലെ കണ്ട്വ ജില്ലയില്‍ സ്വാമി വിവേകാനന്ദ വ്യഗ്യന്മാല എന്ന പ്രഭാഷണ പരമ്പരയില്‍ പങ്കെടുത്തതിനു ശേഷം മാധ്യമപ്രവര്‍ത്തകരോട് സംസാരിക്കവെയാണ് അദ്ദേഹം ഇത്തരത്തില്‍ പരാമര്‍ശം നടത്തിയത്.

ഗണപതിയുടെ ചിത്രം ഇന്തോനേഷ്യല്‍ കറന്‍സിയില്‍ പതിച്ചതിനെ കുറിച്ചുള്ള ചോദ്യത്തിന് മറുപടി പറയുകയായിരുന്നു അദ്ദേഹം. 'പ്രധാനമന്ത്രി നരേന്ദ്ര മോദിയ്ക്കാണ് ഇതിന് ഉത്തരം നല്‍കാന്‍ കഴിയുക. ഞാന്‍ ഇതില്‍ അനുകൂലനാണ്. ഗണപതി പ്രതിബന്ധങ്ങള്‍ നീക്കുന്നു. ലക്ഷ്മി ദേവിയുടെ ചിത്രം നോട്ടില്‍ ഉള്‍പ്പെടുത്തിയാല്‍ രൂപയുടെ തകര്‍ച്ച ഇല്ലാതാക്കാം. ആരും ഇതിനെ മോശമായി കാണരുത്', സുബ്രഹ്മണ്യ സ്വാമി പറഞ്ഞു.

പൗരത്വ നിയമ ഭേദഗതിയില്‍ എതിര്‍പ്പൊന്നും ഇല്ലെന്ന് അദ്ദേഹം കൂട്ടിച്ചേര്‍ത്തു. 'കോണ്‍ഗ്രസും മഹാത്മാഗാന്ധിയും സിഎഎ നടപ്പാക്കണമെന്ന് പറഞ്ഞിട്ടുണ്ട്. 2003 ല്‍ മന്‍മോഹന്‍ സിങ് പാര്‍ലമെന്റില്‍ ഇക്കാര്യം ആവശ്യപ്പെട്ടിട്ടുണ്ട്. ഇപ്പോള്‍ ഞങ്ങള്‍ അത് ചെയ്തു. എന്നാല്‍, അവരിത് അംഗീകരിക്കുന്നില്ല. പാകിസ്ഥാനിലെ മുസ്ലീങ്ങളോട് ഞങ്ങള്‍ അനീതി കാട്ടിയെന്ന് അവര്‍ പറയുന്നു. എന്ത് അനീതിയാണ് ചെയ്തത്?. പാകിസ്ഥാനിലെ മുസ്ലീങ്ങള്‍ക്ക് ഇന്ത്യയിലേക്ക് വരാന്‍ ആഗ്രഹമില്ല. അതിനാല്‍, ഞങ്ങള്‍ അവരെ നിര്‍ബന്ധിക്കുന്നുമില്ല', സുബ്രഹ്മണ്യ സ്വാമി വ്യക്തമാക്കി.

മുസ്ലീങ്ങളുടെയും ഹിന്ദുക്കളുടെയും ഡിഎന്‍എ ബ്രാഹ്മണരുടെയും ദളിതരുടെയും പോലെയാണെന്ന് സ്വാമി പറഞ്ഞു. ഏകീകൃത സിവില്‍ കോഡ് ഉടനെ തന്നെ നടപ്പാക്കുമെന്നും സുബ്രഹ്മണ്യന്‍ സ്വാമി കൂട്ടിച്ചേര്‍ത്തു.