'ഇനി ഗോവ'; മഹാരാഷ്ട്രയ്ക്ക് പിന്നാലെ ബിജെപിയ്ക്ക് ഗോവയും നഷ്ടമാകുമെന്ന് ശിവസേന

ഗോവയിൽ ഒരു അത്ഭുതം സംഭവിക്കാൻ പോവുകയാണെന്നും ബിജെപി ഭരിക്കുന്ന സംസ്ഥാനത്ത് രാഷ്ട്രീയ ഭൂകമ്പം ഉണ്ടാകുമെന്നുമാണ് സഞ്ജയ് റാവത്ത് പറയുന്നത്. ഗോവ സർക്കാരിനെ നിലവിൽ പിന്തുണക്കുന്ന ഏതാനം എംഎൽഎമാരുമായി താൻ സംസാരിച്ചെന്നും സഞ്ജയ് റാവത്ത് പറയുന്നു. ഗോവ ഫേർവേഡ് പാർട്ടി പ്രസിഡണ്ട് വിജയ് സർദേശായിയും മൂന്ന് എംഎൽഎമാരും ശിവസേനയുമായി ബന്ധപ്പെടുന്നുണ്ട്. ഞാൻ നിലവിലെ സർക്കാരിനെ പിന്തുണക്കുന്ന മഹാരാഷ്ട്രവദി ഗോമന്തക് പാർട്ടി തലവൻ സുധിൻ ദിവാകറും മറ്റ് എംഎൽഎമാരുമായും സംസാരിച്ചിരുന്നു' റാവത്ത് പറയുന്നു.

കോൺഗ്രസുമായി ചേർന്ന് ഗോവയിലും സർക്കാർ രൂപീകരിക്കാനൊരുങ്ങുകയാണെന്നതിന്‍റെ സൂചനകളും സഞ്ജയ് റാവത്ത് നൽകി. ഗോവയിൽ ബിജെപി സർക്കാർ രൂപീകരിച്ചത് നിയമവിരുദ്ധമായാണെന്നും അവിടെ പുതിയൊരു സഖ്യമുണ്ടാക്കാനാണ് തങ്ങൾ ലക്ഷ്യമിടുന്നതെന്നും റാവത്ത് പറഞ്ഞു. 'കോൺഗ്രസ് ഉൾപ്പെടെയുള്ള പാർട്ടികളുമായി ചേർന്ന് സഖ്യം രൂപീകരിക്കും. വലിയൊരു രാഷ്ട്രീ പ്രതിസന്ധി അവിടെയുമുണ്ടാകും ഗോവയിലും അത്ഭുതം സംഭവിക്കുമെന്നാണ് കരുതുന്നത്.' ശിവസേന നേതാവ് പറഞ്ഞു.

ഗോവ ഫേർവേഡ് പാർട്ടി തലവൻ വിജയ് സർദേശായി ശിവസേനയുമായി ബന്ധപ്പെട്ടെന്ന വാർത്ത പുറത്തുവന്നതോടെ തന്നെ സംസ്ഥാനത്തെ ബിജെപി ക്യാംപുകളിൽ ആശങ്ക ഉയർന്നതായാണ് റിപ്പോർട്ട്. വെള്ളിയാഴ്ച രാവിലെ സർദേശായി സഞ്ജയ് റാവത്തിനെ വിളിച്ച് സംസ്ഥാനത്തെ രാഷ്ട്രീയ സ്ഥിതിഗതികൾ ചർച്ച ചെയ്തതായാണ് വാർത്ത

മഹാരാഷ്ട്രയിൽ രൂപംകൊണ്ടത് പോലെയുള്ള സഖ്യം ഇന്ത്യയിൽ എവിടെയും ആവർത്തിക്കാമെന്നാണ് ഫേർവേഡ് പാർട്ടി തലവൻ സർദേശായി പറയുന്നത്. 'ഞങ്ങളൊരു പ്രാദേശിക പാർട്ടിയാണ്. മഹാരാഷ്ട്രയിൽ സംഭവിച്ചത് ഇന്ത്യയിൽ എവിടെയും സംഭവിക്കാമെന്നാണ് ഞങ്ങൾക്ക് തോന്നുന്നത്. ശിവസേന, എൻസിപി തുടങ്ങിയ മറ്റ് പാർട്ടികളുമായി ചേർന്ന് ശക്തമായ ഒരു മുന്നണി രൂപീകരിക്കാൻ ഞങ്ങൾ ആഗ്രഹിക്കുന്നു.' അദ്ദേഹം പറഞ്ഞു.

2017ല്‍ നടന്ന തെരഞ്ഞെടുപ്പില്‍ കോൺഗ്രസിന് 17 സീറ്റും ബിജെപിയ്ക്ക് 13 സീറ്റുമാണ് ലഭിച്ചത്. കോൺഗ്രസ് അധികാരത്തിലെത്തുമെന്ന് കരുതിയിരുന്നെങ്കിലും കോൺഗ്രസ് എംഎൽഎമാരെ കൂടെ ചേർത്ത് ബിജെപി സർക്കാർ രൂപീകരിക്കുകയായിരുന്നു.