ചുട്ടുകളയുമെന്ന് കോണ്‍ഗ്രസ് എംഎല്‍എയുടെ ഭീഷണി; പോലീസ് സ്‌റ്റേഷനില്‍ പരാതിയുമായി പ്രഗ്യാ സിങ്

ഭോപ്പാല്‍: കോണ്‍ഗ്രസ് എംഎല്‍എ തന്നെ ചുട്ടുകളയുമെന്ന് ഭീഷണിപ്പെടുത്തിയെന്ന പരാതിയുമായി ബിജെപി എം പി പ്രഗ്യാ സിങ് താക്കൂര്‍ പോലീസ് സ്‌റ്റേഷനില്‍. മഹാത്മാ ഗാന്ധിയുടെ ഘാതകനായ നാഥൂറാം ഗോഡ്‌സെയെ കുറിച്ചുള്ള പരാമര്‍ശത്തില്‍ പ്രഗ്യയെ ചുട്ടുകളയുമെന്ന് ഭീഷണിപ്പെടുത്തിയിരിക്കുന്നതെന്ന് പരാതിയില്‍ പറയുന്നു. മധ്യപ്രദേശിലെ കമല നെഹ്‌റു പോലീസ് സ്‌റ്റേഷനില്‍ ശനിയാഴ്ച രാത്രിയാണ് പ്രഗ്യ പരാതി നല്‍കിയതെന്ന് മുതിര്‍ന്ന പോലീസ് ഉദ്യോഗസ്ഥന്‍ പറഞ്ഞു.

സംഭവത്തില്‍ പ്രഗ്യയുമായി ചര്‍ച്ച നടത്തിയതായി അഡീഷണല്‍ എസ് പി സഞ്ജയ് സഹു പറഞ്ഞു. 'പ്രഗ്യാ സിങിന്‍റെ പ്രതിമ മാത്രമല്ല കത്തിക്കുന്നത്, പക്ഷേ അവര്‍ ഇവിടെ വരികയാണെങ്കില്‍ അവരെയും ചുട്ടുകൊല്ലും', മധ്യപ്രദേശിലെ ബിയോരായിലെ കോണ്‍ഗ്രസ് എംഎല്‍എ ഗോവര്‍ദ്ധന്‍ ദംങ്കി പറഞ്ഞു. എന്നാല്‍, പിന്നീട് വിവാദമായതോടെ അദ്ദേഹം മാപ്പു പറഞ്ഞു.

നവംബര്ഡ 27 ന് ലോക്ഭയില്‍ ഗോഡ്‌സെ അനുകൂല പരാമര്‍ശം നടത്തിയതിന് പ്രഗ്യാ സിങ് മാപ്പു പറഞ്ഞിരുന്നു. പ്രഗ്യയുടെ പരാതിയില്‍ കേസെടുത്തിട്ടുണ്ടോയെന്ന ചോദ്യത്തിന് പ്രഗ്യയുമായി ചര്‍ച്ച നടത്തുകയാണെന്നായിരുന്നു അഡീഷണല്‍ എസ് പി യുടെ പ്രതികരണം.