മീ ടൂ ക്യാമ്പയിനെതിരെ ആരോപണവുമായി ബി.ജെ.പി എം.പി

ന്യൂഡൽഹി: മീ ടൂ ക്യാമ്പയിനെതിരെ രൂക്ഷ ആരോപണം ഉന്നയിച്ച് ബി.ജെ.പി എം.പി രംഗത്ത്. തെറ്റായ രീതിയുടെ തുടക്കമാണ് ഇതെന്ന് ബി.ജെ.പി എം.പി ഉദിത് രാജ് വ്യക്തമാക്കി. രണ്ടു മുതല്‍ നാലു ലക്ഷം വരെ വാങ്ങി സ്ത്രീകൾ പുരുഷന്മാര്‍ക്കെതിരെ ആരോപണം ഉന്നയിക്കാറുണ്ടെന്ന് ഉദിത് രാജിനെ ഉദ്ധരിച്ച് എ.എന്‍.ഐ വാര്‍ത്താ ഏജന്‍സി റിപ്പോര്‍ട്ട് ചെയ്തു.

മീ ടൂ കാമ്പയിന്‍ ആവശ്യമുള്ളത് തന്നെയാണ്. എന്നാല്‍ ആര്‍ക്കെങ്കിലും എതിരെ പത്തു വര്‍ഷത്തിനു ശേഷം ലൈംഗിക ആരോപണം ഉന്നയിക്കുന്നതില്‍ കാര്യമുണ്ടോ എന്നും അദ്ദേഹം ചോദിച്ചു. വര്‍ഷങ്ങള്‍ക്ക് മുമ്പുള്ള ആരോപണത്തിലെ വാസ്തവം കണ്ടെത്താൻ സാധിക്കുമോ എന്ന ചോദ്യവും ഉദിത് രാജ് ഉന്നയിച്ചു. ആരോപണ വിധേയനായ വ്യക്തിയുടെ പ്രതിച്ഛായ തകര്‍ക്കുന്ന ഈ ക്യാംപെയിൻ തെറ്റായ രീതിയുടെ തുടക്കമാണെന്ന് ബി.ജെ.പി എം.പി ട്വീറ്റ് ചെയ്തു.





നാനാ പടേക്കര്‍ അടക്കമുള്ളവര്‍ക്കെതിരെ മീ ടൂ ക്യാപെയിനിൻ്റെ ഭാഗമായി ആരോപണങ്ങള്‍ ഉയര്‍ന്നതിന് പിന്നാലെയാണ് ബി.ജെ.പി എം.പി ഇത്തരത്തിൽ പ്രതികരിച്ചത്. വളരെ ശക്തമായ ഭാഷയിലാണ് അദ്ദേഹം മീ ടൂ ക്യാംപെയിനിനെ കുറിച്ച് മാധ്യമങ്ങളോട് പ്രതികരിച്ചത്.

ചിത്രം കടപ്പാട്: എഎൻഐ