ബിജെപി എല്ലായിടത്തും ഒരു പൊതി നുണകള്‍ തുറന്നു വിടും: വൃന്ദ കാരാട്ട്

അഗര്‍ത്തല: ബിജെപിക്കെതിരെ ശക്തമായി ആഞ്ഞടിച്ച് സിപിഎം നേതാവ് വൃന്ദ കാരാട്ട്. ബിജെപി എവിടെ പോയാലും ഒരു പൊതി നുണകള്‍ തുറന്നുവിടുമെന്നവര്‍ പറഞ്ഞു. കേന്ദ്ര ആഭ്യന്തരമന്ത്രി രാജ്നാഥ് സിങിന്‍റെ പ്രസ്താവനകള്‍ക്ക് മറുപടിയായാണ് അവര്‍ ഇങ്ങനെ തുറന്നടിച്ചത്.

ത്രിപുര തിരഞ്ഞെടുപ്പിനോട് അനുബന്ധിച്ചുള്ള പ്രചാരണ പരിപാടികൾക്കായി എത്തിയപ്പോഴായിരുന്നു അദ്ദേഹം സിപിഎമ്മിനെതിരെ പ്രസ്താവന നടത്തിയത്. ബിജെപി അധികാരത്തിലെത്തിയാൽ ഏതു ആശയങ്ങളിൽ വിശ്വസിക്കുന്നവര്‍ക്കും സുരക്ഷിതമായും സമാധാനപരമായും കഴിയാമെന്നാണ് തിരഞ്ഞെടുപ്പു റാലിയെ അഭിസംബോധന ചെയ്ത് സിങ് സംസാരിച്ചത്.

ഇതിനു മറുപടിയായാണു രാജ്നാഥ് സിങ്ങും മറ്റുള്ളവരും ഒരു മെഷിൻ കൊണ്ടുപോകുന്നുണ്ടെന്നും എവിടെപ്പോയാലും പുതിയ ഒരു പൊതി നുണകൾ നിർമിക്കുകയാണ് അവരുടെ തൊഴിലെന്നും വൃന്ദ കാരാട്ട് പരിഹസിച്ചത്.