ആരാധനാലയങ്ങൾ തുറക്കണം; കൊവിഡ് തീവ്രബാധിത മഹാരാഷ്ട്രയിൽ പ്രതിഷേധവുമായി ബിജെപി

മുംബൈ: പ്രതിദിന കൊവിഡ് കേസുകളിൽ വൻ വർധനവ് തുടരുമ്പോഴും സംസ്ഥാനത്തെ ആരാധനാലയങ്ങൾ തുറക്കണമെന്നാവശ്യപ്പെട്ട് ബിജെപി. 'റിങ് ദ ബെൽ' പ്രതിഷേധവുമായാണ് ബിജെപി സംസ്ഥാന ഘടകം രംഗത്തെത്തിയിരിക്കുന്നത്. ഇന്നലെ സംസ്ഥാനത്ത് 16,000ത്തിലധികം കേസുകളായിരുന്നു റിപ്പോർട്ട് ചെയ്തത്. ഇതേദിനം തന്നെയാണ് പ്രതിഷേധവും നടന്നത്.

'സംസ്ഥാന സർക്കാർ മദ്യശാലകളും ഷോപ്പിങ് ഔട്ട്‍ലെറ്റുകളും തുറന്നു. എന്നാൽ ആരാധനാലയങ്ങൾ തുറന്നിട്ടില്ല. ഇത് അംഗീകരിക്കാനാവില്ല' ബിജെപി സംസ്ഥാന അധ്യക്ഷൻ ചന്ദ്രകാന്ത് പാട്ടീൽ പറഞ്ഞു. പാർട്ടി നേതാക്കളും പ്രവർത്തകരും പ്രമുഖ ക്ഷേത്രങ്ങളുടെ മുന്നിൽ മണിയടിച്ച് പ്രതിഷേധിച്ച് കൊണ്ടാണ്ടാണ് ആരാധനാലയങ്ങൾ തുറക്കണമെന്ന് ആവശ്യപ്പെട്ടത്.

Also Read: മഹാരാഷ്ട്രയിൽ 16,867 കൊവിഡ് കേസുകൾ; കർണാടകയിൽ 115 മരണം

കേന്ദ്ര സർക്കാർ ക്ഷേത്രങ്ങളും, പള്ളികളും, മറ്റ് ആരാധനാലയങ്ങളും തുറക്കാൻ അനുമതി നൽകിയിട്ടുണ്ട്. എന്നാൽ സംസ്ഥാന സർക്കാർ മുൻ നിലപാടിൽ ഉറച്ച് നിൽക്കുകയാണ്. ചന്ദ്രകാന്ത് പാട്ടീൽ പറഞ്ഞു. ക്ഷേത്രത്തിലേക്ക് ആളുകൾക്ക് പ്രവേശനം അനുവദിച്ചാൽ ആവർക്ക് മാനസിക ആശ്വാസം ലഭിക്കുമെന്നാണ് മുതിർന്ന നേതാവും മുൻ മുഖ്യമന്ത്രിയുമായ ദേവേന്ദ്ര ഫഡ്നാവിസ് പ്രതികരിച്ചത്.


ആരാധനാലയങ്ങൾ തുറക്കണമെന്നാവശ്യപ്പെട്ട് പ്രക്ഷോഭം തുടങ്ങുമെന്ന് പ്രതിപക്ഷമായ ബിജെപിയും പ്രകാശ് അംബേദ്കറുടെ വഞ്ചിത് ബഹുജൻ അഖാഡിയും പ്രഖ്യാപിച്ചിട്ടുണ്ട്. മഹാരാഷ്ട്ര നവനിർമാൺ സേനയും സമാജ്‌വാദി പാർട്ടിയും ഓൾ ഇന്ത്യ മജ്‌ലിസ് ഇ ഇത്തഹാദുൽ മുസ്ലിമീനും ഈ ആവശ്യത്തിന് പിന്തുണയും പ്രഖ്യാപിച്ചു.

Also Read: അൺലോക്ക് 4 മാർഗനിർദേശങ്ങൾ പുറത്ത്; മെട്രോ ട്രെയിനുകൾ ഓടും; നിർദേശങ്ങൾ ഇങ്ങനെ

രാജ്യത്ത് ഏറ്റവും കൂടുതൽ കൊവിഡ് കേസുകളുള്ള മഹാരാഷ്‌ട്രയിൽ കഴിഞ്ഞ 24 മണിക്കൂറുകളിൽ 16,867 പുതിയ കേസുകളും 328 മരണങ്ങളുമാണ് ശനിയാഴ്ച സ്ഥിരീകരിച്ചിരിച്ചത്. ഇതോടെ സംസ്ഥാനത്തെ പോസിറ്റീവ് കേസുകളുടെ എണ്ണം 7,64,281 ആയി ഉയർന്നിരിക്കുകയാണ്. വിവിധ ജില്ലകളിലായി 1,85,131 ആക്ടീവ് കേസുകളാണ് നിലവിലുള്ളത്. 5,54,711 പേർ രോഗമുക്തി നേടിയപ്പോൾ കൊവിഡ് മരണങ്ങൾ 24,103 ആയി ഉയർന്നിരിക്കുകയാണ്. ഈ സാഹചര്യത്തിൽ തന്നെയാണ് ക്ഷേത്രങ്ങൾ തുറക്കണമെന്ന ആവശ്യവും ശക്തമായിരിക്കുന്നത്.