രാജ്യസഭയിൽ ബിജെപി ഏറ്റവും വലിയ ഒറ്റകക്ഷിയാകും

ന്യൂഡൽഹി: പാര്‍ലമെന്‍റിലെ ഉപരിസഭയായ രാജ്യസഭയിൽ 67 അംഗങ്ങളുമായി ബിജെപി ഏറ്റവും വലിയ ഒറ്റക്കക്ഷിയാകും. 245 അംഗ സഭയിൽ നിലവിൽ ബിജെപിക്ക് 57 അംഗങ്ങളാണുള്ളത്. എൻഡിഎക്ക് 67 അംഗങ്ങളുണ്ടാകും.

രാജ്യസഭയിലെ ഏറ്റവും വലിയ ഒറ്റക്കക്ഷിയായിരുന്ന കോൺഗ്രസിന്‍റെ അംഗങ്ങളുടെ എണ്ണം 48 ആയി കുറയും. യുപിഎ അംഗങ്ങളുടെ എണ്ണം 63 ആയും കുറയും. ഇതോടെ കോൺഗ്രസ് രണ്ടാം സ്ഥാനത്തേക്ക് തള്ളപ്പെടും. ഗുജറാത്ത്, ഹിമാചൽ പ്രദേശ്, ഉത്തർപ്രദേശ്, മഹാരാഷ്ട്ര, രാജസ്ഥാൻ ഹരിയാന, ഝാർഖണ്ഡ്, ഉത്തരാഖണ്ഡ് എന്നീ സംസ്ഥാനങ്ങളിൽ നേടിയ വിജയമാണ് ബിജെപി അംഗങ്ങളുടെ എണ്ണത്തിൽ വർധനവുണ്ടാക്കിയത്. കോൺഗ്രസിനും സമാജ് വാജി പാർട്ടിക്കുമാണ് കനത്ത നഷ്ടം ഉണ്ടായത്. ഇവർക്ക് അഞ്ച് സീറ്റുകളാണ് നഷ്ടമായത്.