ബംഗാളിൽ രണ്ടക്കം കടക്കാൻ ബിജെപി ബുദ്ധിമുട്ടും; പ്രവചനവുമായി പ്രശാന്ത് കിഷോർ

കൊൽക്കത്ത: അടുത്തവർഷം നടക്കുന്ന ബംഗാൾ നിയമസഭാ തെരഞ്ഞെടുപ്പിൽ രണ്ടക്കം കടക്കാൻ ബിജെപി യഥാർഥത്തിൽ ബുദ്ധിമുട്ടുമെന്ന് പ്രശാന്ത് കിഷോർ. അമിത് ഷായുടെയും ജെപി നദ്ദയുടെയും നേതൃത്വത്തിൽ ബിജെപി സംസ്ഥാനത്തെ തെരഞ്ഞെടുപ്പ് പ്രചരണങ്ങൾ ശക്തിപ്പെടുത്തുന്നതിനിടെയാണ് തെരഞ്ഞെടുപ്പ് തന്ത്രജ്ഞനായ പ്രശാന്ത് കിഷോറിന്‍റെ പരാമർശം പുറത്ത് വരുന്നത്.

ഒരുവിഭാഗം മാധ്യമങ്ങളുടെയും മറ്റും പിന്തുണ ഉണ്ടെങ്കിലും യഥാർഥത്തിൽ സംസ്ഥാനത്ത് ബിജെപി രണ്ടക്കം കടക്കാൻ ബുദ്ധിമുട്ടുമെന്നാണ് പ്രശാന്ത് കിഷോർ ട്വീറ്റ് ചെയ്തത്. കേന്ദ്ര ആഭ്യന്തര മന്ത്രി അമിത് ഷായുടെ പശ്ചിമബംഗാൾ സന്ദർശനം കഴിഞ്ഞതിന്‍റെ പിറ്റേദിവസമാണ് പ്രശാന്ത് കിഷോർ ഇത്തരത്തിൽ പരാമർശം നടത്തിയതെന്നും ശ്രദ്ധേയമാണ്.

പൗരത്വ നിയമം എപ്പോൾ നടപ്പാക്കും? അമിത് ഷായുടെ പ്രതികരണം ഇങ്ങനെ

ഇന്നലെ സംസ്ഥാനത്ത് സംസാരിക്കവെ ബിജെപി അടുത്തവർഷം ബംഗാളിൽ സർക്കാർ രൂപീകരിക്കുമെന്നും അമിത് ഷാ പറഞ്ഞിരുന്നു. 294 സീറ്റുള്ള സംസ്ഥാനത്ത് 200 ഓളം സീറ്റുകൾ നേടുമെന്നായിരുന്നു അമിത് ഷായുടെ വാക്കുകൾ. മമതാ ബാനർജിയുടെ ദുർഭരണവും അഴിമതിയും സ്വജനപക്ഷപാതവും കാരണമാണ് കൂടുതൽ പേർ തൃണമൂൽ വിടുന്നതെന്നും അമിത് ഷാ പറഞ്ഞിരുന്നു.

ഇതൊരു തുടക്കം മാത്രമാണ്. തെരഞ്ഞെടുപ്പ് ആകുമ്പോഴേക്കും നിങ്ങൾ ഒറ്റയ്ക്കാകും. തൃണമൂൽ വിട്ട് വന്ന നേതാക്കളെ സ്വീകരിക്കവെ അമിത് ഷാ പറഞ്ഞു. സുവേന്ദു അധികാരിയും വിവിധ പാർട്ടികളിൽ നിന്നുളള ഒമ്പത് എംഎൽഎമാർ, തൃണമൂൽ എംപിയായിരുന്ന സുനിൽ മൊണ്ടാൽ എന്നിവരാണ് കഴിഞ്ഞദിവസം ബിജെപിയിൽ ചേർന്നത്.

കേന്ദ്രവുമായുള്ള തർക്കം: പിന്തുണ അറിയിച്ച 4 മുഖ്യമന്ത്രിമാർക്കും സ്റ്റാലിനും നന്ദി പറഞ്ഞ് മമത ബാനർജി

കൊവിഡ് വാക്സിൻ വന്നാലുടൻ പൗരത്വ നിയമം നടപ്പാക്കുമെന്നും അമിത് ഷാ പറഞ്ഞിരുന്നു. നിയമം നടപ്പാക്കുന്ന ഘട്ടത്തിലാണ് കൊവിഡ് വന്നത്. അതിനാൽ ചട്ടങ്ങൾ പൂ‍ര്‍ത്തിയാക്കാൻ കഴിഞ്ഞില്ല, നിയമം നടപ്പാക്കുന്നത് വൈകിയത് അതിനാലാണെന്നും ഷാ വ്യക്തമാക്കി.