സ്വാമി പരിപൂർണ്ണാനന്ദയെ അവതരിപ്പിക്കാനൊരുങ്ങി ബിജെപി

ഹൈദരാബാദ്: ഉത്തർപ്രദേശിൽ യോഗി ആദിത്യനാഥിനെ അവതരിപ്പിച്ച പോലെ തെലങ്കാനയിൽ ഒരു സന്യാസി നേതാവിനെ അവതരിപ്പിക്കാനൊരുങ്ങി ബിജെപി. സ്വാമി പരിപൂർണ്ണാനന്ദയെ തെലങ്കാന പിടിക്കാൻ രംഗത്തിറക്കാന്‍ ഒരുങ്ങുകയാണ് ബിജെപി. സംഘപരിവാർ സംഘടനകൾ ഇതിന് മുന്നോടിയായി കഴിഞ്ഞ ദിവസം പരിപൂർണാനന്ദക്ക് ഹൈദരാബാദിൽ സ്വീകരണം നൽകിയിരുന്നു.നിലവിൽ ബിജെപി അംഗമല്ലാത്ത പരിപൂർണാനന്ദയെ തെരഞ്ഞെടുപ്പിൽ മത്സരിപ്പിക്കാനുള്ള ഒരുക്കത്തിലാണ് ബിജെപി.

ബിജെപിയുമായി യോജിക്കുന്ന ആദർശമാണ് തനിക്കുള്ളതെന്നും പാർട്ടിയിൽ ഉടൻ ചേരുമെന്നും സ്വാമി പരിപൂർണാനന്ദ വ്യക്തമാക്കി. സ്വാമിയെ ഹൈദരാബാദിൽ നിന്ന് പർലമെൻ്റിലേക്കോ സംസ്ഥാന നിയമസഭയിലേക്കോ മത്സരിപ്പിക്കാനാണ് ബിജെപി ശ്രമിക്കുന്നത്.കുറച്ച് ദിവസങ്ങൾക്ക് മുൻപ് ആർഎസ്എസ് അധ്യക്ഷൻ മോഹൻ ഭാഗവത്തിനെ സ്വാമി സന്ദർശിച്ചിരുന്നു.യോഗി ആദിത്യനാഥ് ഏറെ രാഷ്ട്രീയ പരിചയമുള്ള വ്യക്തിയാണെന്നും ഉന്നതമായ വ്യക്തിത്വം ഉള്ളതിനാലാണ് അദ്ദേഹം അറിയപ്പെടുന്നതെന്നും സ്വാമി പരിപൂർണാനന്ദ വ്യക്തമാക്കി.

അടുത്ത തെരഞ്ഞെടുപ്പിൽ ബിജെപിക്ക് പ്രവർത്താക്കണമെന്നാണ് ആഗ്രഹിക്കുന്നതെന്നും അദ്ദേഹം വ്യക്തമാക്കി. വിദ്വേഷ പ്രസംഗം നടത്തിയതിന് കഴിഞ്ഞ ജൂലൈ മുതൽ ആറ് മാസത്തേക്ക് ഹൈദരാബാദിൽ പ്രവേശിക്കുന്നതിൽ നിന്ന് സ്വാമിയെ പോലീസ് വിലക്കിയിരുന്നു. സ്വാമി അതിനെതിരെ നൽകിയ ഹർജി അംഗീകരിച്ച് തെലങ്കാന ഹൈക്കോടതി വിലക്ക് നീക്കിയതിനെ തുടർന്നാണ് ഇപ്പോൾ ഹൈദരാബാദിൽ തിരിച്ചെത്തിയത്.