ബ്രിട്ടൻ പിടിച്ചെടുത്ത ഇറാൻ കപ്പലിലെ ഇന്ത്യൻ നാവികരെ അറസ്റ്റ് ചെയ്തു

ന്യൂഡൽഹി: ബ്രിട്ടൻ പിടിച്ചെടുത്ത ഇറാൻ കപ്പലായ ഗ്രേസ് - 1ലെ ഇന്ത്യൻ നാവികരെ അറസ്റ്റ് ചെയ്തതായി റിപ്പോർട്ട്. അറസ്റ്റിലായവരെ പിന്നീട് ജാമ്യത്തിൽ വിട്ടയച്ചതായി റിപ്പോർട്ട് ലഭിച്ചെന്ന് വിദേശകാര്യമന്ത്രി സഹമന്ത്രി വി.മുരളീധരൻ അറിയിച്ചു. ഇന്ന് വൈകുന്നേരം തന്നെ ലണ്ടനിലെ ഇന്ത്യൻ ഹൈക്കമ്മീഷണർ നവീകരുമായി സംസാരിക്കുമെന്നും മന്ത്രി അറിയിച്ചു.

ഗ്രേസ് - 1ൽ മൂന്ന് മലയാളികൾ ഉണ്ടെന്ന് നേരത്തെ വിവരം ലഭിച്ചിരുന്നു. 24 ഇന്ത്യൻ നാവികാരാണ് ഗ്രേസ് - 1 കപ്പലിലുള്ളത്. ആരെയൊക്കെയാണ് അറസ്റ്റ് ചെയ്തതെന്ന് ഇത് വരെ വ്യക്തമല്ല. അതെ സമയം, ഇറാൻ പിടികൂടിയ ബ്രിട്ടന്റെ സ്റ്റെന ഇംപെറോയിലെ ഇന്ത്യൻ നാവികരുടെ മോചനത്തിനായി ഇന്ത്യൻ വിദേശകാര്യമന്ത്രാലയം നടപടി സ്വീകരിച്ച് വരികയാണ്. ഇവരുടെ മോചനത്തിന് വിദേശകാര്യ സെക്രട്ടറി വിജയ് ഗോഖലെ ഇന്ത്യയിലെ ഇറാൻ അംബാസഡറുമായി ചർച്ച നടത്തി. ഇനാനിലെ ഇന്ത്യൻ അംബാസഡറും വിഷയത്തിൽ ഇടപെടുന്നുണ്ട്.

സ്റ്റെന ബള്‍ക് കപ്പൽ ഉടമകൾ നാവികരെ കാണണമെന്ന് കാണിച്ച് ബന്ദർ അബ്ബാസ് തുറമുഖ അധികൃതർക്ക് അപേക്ഷ നൽകിയിരുന്നു. എന്നാൽ, അപേക്ഷക്ക് ഇത് വരെ അനുകൂല മറുപടി ലഭിച്ചില്ല. ഇറാൻ ഉന്നയിച്ച ആരോപണങ്ങൾ സ്റ്റെന ഇംപെറോ ഉടമകളായ സ്റ്റെന ബള്‍ക് നിഷേധിച്ചു. സ്റ്റെന ഇംപെറോ മത്സ്യബന്ധന ബോട്ടിൽ ഇടിച്ചുവെന്നായിരുന്നു ഇറാന്റെ ആരോപണം. എന്നാൽ, കപ്പൽ എല്ലാ സജ്ജീകരണങ്ങളും സ്വീകരിച്ചിരുന്നുവെന്നും നിയമങ്ങളും ചട്ടങ്ങളും പാലിച്ചാണ് ഹോർമുസ് കടലിടുക്കിലൂടെ കടന്നു പോയതെന്നും ഉടമകൾ പ്രതികരിച്ചു.