ഗൗരി ലങ്കേഷ് വധം സിബിഐ അന്വേഷിക്കണമെന്ന് സഹോദരൻ, വേണ്ടെന്ന് സഹോദരി

ബെംഗലുരു: മാധ്യമപ്രവര്‍ത്തക ഗൗരി ലങ്കേഷിന്‍റെ കൊലപാതകം സംബന്ധിച്ച കേസ് സിബിഐ അന്വേഷിക്കണമെന്ന ആവശ്യവുമായി സഹോദരൻ ഇന്ദ്രജിത് രംഗത്തെത്തി. എന്നാൽ സിബിഐ അന്വേഷണം ആവശ്യമില്ലെന്നും നിലവിലെ അന്വേഷണം തൃപ്തികരമാണെന്നും സഹോദരി കവിത ലങ്കേഷ് പറഞ്ഞു.

കൊലപാതകക്കേസിൽ പ്രത്യേക അന്വേഷണസംഘം അന്വേഷണം ആരംഭിച്ച് അഞ്ച് മാസം പിന്നിട്ടെങ്കിലും എങ്ങുമെത്തിയിട്ടില്ലെന്നും രാഷ്ട്രീയതാത്പര്യങ്ങള്‍ അന്വേഷണത്തെ ബാധിക്കുന്നതായി സംശയിക്കുന്നതായും ഇന്ദ്രജിത് പറഞ്ഞു. സിബിഐ അന്വേഷണം ആവശ്യപ്പെട്ട് ഹൈക്കോടതിയെ സമീപിക്കുമെന്നും ഗൗരി ലങ്കേഷിന്‍റെ 56-ാം ജന്മദിനമായിരുന്ന തിങ്കളാഴ്ച ഇന്ദ്രജിത് മാധ്യമങ്ങളോടു പറഞ്ഞു.

എന്നാൽ അന്വേഷണത്തിൽ വിശ്വാസമുണ്ടെന്നും അന്വേഷണം സംബന്ധിച്ച വിവരങ്ങള്‍ അന്വേഷണസംഘം തന്നെയും അമ്മയെയും അറിയിക്കാറുണ്ടെന്നും ഗൗരി ലങ്കേഷിന്‍റെ സഹോദരി കവിത പറഞ്ഞു. കൊലപാതകം സംബന്ധിച്ച് തെളിവുകള്‍ ലഭിച്ചിട്ടുണ്ടെന്നും അവര്‍ പറഞ്ഞു. ഇന്ദ്രജിത് വേണ്ടവിധം കാര്യങ്ങള്‍ മനസിലാക്കാതെയാണ് പ്രതികരിക്കുന്നതെന്നും അവര്‍ കൂട്ടിച്ചേര്‍ത്തു.

ഗൗരി ലങ്കേഷിന്‍റെ 56-ാം ജന്മദിനമായ ഇന്നലെ ഗൗരിദിനമായി ആചരിച്ചു. ജിഗ്നേഷ് മേവാനി, നടൻ പ്രകാശ് രാജ്, കനയ്യ കുമാര്‍, ഷഹ്ല റാഷിദ്, ഉമര്‍ ഖാലിദ് തുടങ്ങിയവര്‍ ചടങ്ങിൽ പങ്കെടുത്തു. ഈ ചടങ്ങിൽ ഇന്ദ്രജിത് ഉണ്ടായിരുന്നില്ല.