വനത്തില്‍ ധ്യാനിച്ചിരുന്ന ബുദ്ധ സന്യാസിയെ പുള്ളിപ്പുലി പിടിച്ചു

മഹാരാഷ്ട്ര: താഡോബ അന്ധേരി കടുവാ സങ്കേതത്തിൽ ഉള്‍പ്പെട്ട വനത്തിൽ വൃക്ഷച്ചുവട്ടില്‍ ധ്യാനിച്ചിരുന്ന ബുദ്ധസന്യാസി പുള്ളിപ്പുലിയുടെ ആക്രമണത്തില്‍ കൊല്ലപ്പെട്ടു. രാഹുല്‍ വാല്‍കെ(35) എന്ന ബുദ്ധസന്യാസിയെയാണ് പുലി പിടിച്ചത്. മഹാരാഷ്ട്രയില്‍ ചന്ദ്രാപുര്‍ ജില്ലയിലെ രാംദേഗിയിലാണ് സംഭവം നടന്നത്.

കടുവാ സങ്കേതത്തിനുള്ളിലായുള്ള ബുദ്ധവിഹാരത്തിലുള്ള സന്യാസിയാണ് രാഹുൽ. ഒരു മാസത്തിലേറെയായി ഇദ്ദേഹം ഉള്‍വനത്തില്‍ ധ്യാനനിമഗ്നനായിരുന്നു. വിഹാരത്തിലെ സഹായികളായ മറ്റ് രണ്ടു സന്യാസിമാര്‍ ഇദ്ദേഹത്തിനു ഭക്ഷണം കൊണ്ടുപോകാറാണ് പതിവ്. അവരാണ് കഴിഞ്ഞ ദിവസം ഭക്ഷണവുമായെത്തിയപ്പോള്‍ രാഹുൽ വാല്‍കെയെ പുള്ളിപ്പുലി ആക്രമിക്കുന്നതു കണ്ടത്.

സംഭവസ്ഥലത്തു നിന്നും ജീവനും കൊണ്ട് രക്ഷപ്പെട്ട ഇവര്‍ സഹായത്തിന് മറ്റ് ആളുകളുമായെത്തിയപ്പോഴേക്കും സന്ന്യാസിയുടെ മൃതദേഹം വലിച്ചുകൊണ്ട് പുലി ഗുഹയിലേക്ക് കയറിയിരുന്നിരുന്നിരുന്നു. ഈ പ്രദേശത്ത് പുള്ളിപ്പുലിയുടെ ആക്രമണത്തിൽ കൊല്ലപ്പെടുന്ന അഞ്ചാമത്തെയാളാണ് സന്ന്യാസി.