മോദി സംസാരിക്കണമെങ്കിൽ തലസ്ഥാനം വിദേശത്തേയ്ക്ക് മാറ്റണം: ശിവസേന

മുംബൈ: രാജ്യത്തെ ഉലച്ച പീഡനപരമ്പരകള്‍ ‍സംബന്ധിച്ച് പ്രധാനമന്ത്രി നരേന്ദ്ര മോദിയുടെ മൗനത്തെ പരിഹസിച്ച് ശിവസേന. ഇന്ത്യയുടെ തലസ്ഥാനം വിദേശത്തേയ്ക്ക് മാറ്റിയാൽ മാത്രമേ രാജ്യത്തെ ആഭ്യന്തര പ്രശ്നങ്ങളിൽ പ്രധാനമന്ത്രി നിര്‍ണായകമായ പ്രസ്താവനകള്‍ നടത്തൂവെന്നും മോദി ഇപ്പോള്‍ മൗനി ബാബയായി മാറിയിരിക്കുകയാണെന്നും ശിവസേന കുറ്റപ്പെടുത്തി. പാര്‍ട്ടി മുഖപത്രമായ സാമ്നയിലൂടെയായിരുന്നു ശിവസേനയുടെ പ്രതിഷേധം.

ജമ്മു കശ്മീരിൽ എട്ടുവയസുകാരി ക്രൂരബലാത്സംഗത്തിനിരയായ സംഭവത്തിൽ ലണ്ടനിലെത്തിയ ശേഷം മാത്രമാണ് മോദി മിണ്ടിയതെന്നും ഇന്ത്യയിലായിരുന്നപ്പോള്‍ ഒന്നും മിണ്ടിയില്ലെന്നും സാമ്നയിലെ എഡിറ്റോറിയൽ കുറ്റപ്പെടുത്തി. രാജ്യത്ത് നടക്കുന്ന പ്രശ്നങ്ങളെപ്പറ്റി വിദേശത്ത് എത്തിയാലേ അദ്ദേഹം പ്രതികരിക്കൂ. സ്വീഡനിലായിരുന്നപ്പോള്‍ ഇന്ത്യയിലെ സംഭവങ്ങളെപ്പറ്റി അദ്ദേഹം പറഞ്ഞു. അവിടെ നിന്ന് ലണ്ടനിലെത്തിയപ്പോള്‍ ഇന്ത്യക്കാര്‍ക്ക് ഒരു സന്ദേശവും നല്‍കി.

നമ്മുടെ പ്രധാനമന്ത്രി രാജ്യപുരോഗതിയെക്കുറിച്ച് പറയുന്നത് കേള്‍ക്കാൻ തലസ്ഥാനം ലണ്ടനിലേയ്ക്കോ ന്യൂയോര്‍ക്കിലേയ്ക്കോ പാരീസിലേയ്ക്കോ മാറ്റേണ്ടി വരുമെന്നും എഡിറ്റോറിയൽ പരിഹസിച്ചു. രാജ്യത്തുനിന്ന് കോടികളുമായി മുങ്ങിയ വിജയ് മല്യയുടെ അഭയം സുരക്ഷിതമാക്കി വെറുംകൈയോടെയാണ് ലണ്ടനിൽ നിന്ന് മോദി മടങ്ങിയതെന്നും എഡിറ്റോറിയൽ കുറ്റപ്പെടുത്തി.