ബന്ദിപ്പൂരിൽ ആകാശപ്പാത: കര്‍ണാടകയുടെ പിന്തുണ തേടി കേന്ദ്രം

ന്യൂഡൽഹി: ബന്ദിപ്പൂര്‍ വനമേഖലയിലൂടെയുള്ള റോഡ് വീതി കൂട്ടി വികസിപ്പിക്കുന്നതിനും രാത്രിയാത്രാ നിരോധനം ഒഴിവാക്കുന്നതിനുമായി കര്‍ണാടക സര്‍ക്കാരിന്‍റെ പിന്തുണ തേടി കേന്ദ്രസര്‍ക്കാര്‍. അടിയന്തിരമായി ഇക്കാര്യത്തിൽ നിലപാടറിയിക്കണമെന്നാണ് ജൂലൈ 21ന് അയച്ച കത്തിൽ ആവശ്യപ്പെട്ടിട്ടുള്ളത്.

ബന്ദിപ്പൂര്‍ വഴിയുള്ള രാത്രി യാത്രാ നിരോധനം നീക്കണമെന്ന് കേരളം ഏറെക്കാലമായി അവശ്യപ്പെട്ട് വരുന്ന കാര്യമാണ്. കേന്ദ്ര ഉപരിതല വകുപ്പുമായി നേരത്തെ നടത്തിയ ചര്‍ച്ചയിൽ ഇക്കാര്യത്തിൽ എതിര്‍പ്പില്ലെന്ന് കര്‍ണാടക പൊതുമരാമത്ത് വകുപ്പ് അറിയിച്ചിരുന്നു. ഈ സാഹചര്യത്തിലാണ് കേന്ദ്രം ചീഫ് സെക്രട്ടറിയ്ക്ക് പുതിയ കത്ത് നല്‍കിയിരിക്കുന്നത്.

ദേശീയപാത 212ൽ എലിവേറ്റഡ‍് ഹൈവേ നിര്‍മിക്കാനും അതിന് സാധിക്കാത്ത ഭാഗങ്ങളിൽ റോഡിന് ഇരുവശവും എട്ടടി ഉയരത്തിൽ കമ്പിവേലി കെട്ടാനുമാണ് ഗതാഗതവകുപ്പ് ശുപാര്‍ശ ചെയ്തിരിക്കുന്നത്. 46000 രൂപ ചെലവ് കണക്കാക്കുന്ന പദ്ധതിയ്ക്കായി കേരളവും കര്‍ണാടകവും ചേര്‍ന്ന് പണം കണ്ടെത്തണം. സുപ്രീംകോടതിയിൽ ഈ മാസം എട്ടിന് ഇതുസംബന്ധിച്ച് കേസ് പരിഗണനയ്ക്ക് വരുന്നുണ്ട്.