മുല്ലപ്പെരിയാറിലെ ജലനിരപ്പ് സംബന്ധിച്ച തര്‍ക്കത്തില്‍ കേന്ദ്ര ഇടപെടല്‍

ന്യൂഡല്‍ഹി: മുല്ലപ്പെരിയാറിലെ ജലനിരപ്പ് സംബന്ധിച്ച കേരള-തമിഴ്നാട് തര്‍ക്കത്തില്‍ കേന്ദ്ര ഇടപെടല്‍. വിഷയം ചര്‍ച്ച ചെയ്യുന്നതിനായി ക്യാബിനറ്റ് സെക്രട്ടറിയുടെ നേതൃത്വത്തില്‍ പുതിയ കമ്മിറ്റിക്ക് രൂപം നല്‍കി. കേന്ദ്ര ജലകമ്മീഷന്‍ അദ്ധ്യക്ഷന്‍ ചെയര്‍മാനായാണ് കമ്മിറ്റി രൂപീകരിച്ചിരിക്കുന്നത്.

കേരളത്തിലെയും തമിഴ്നാട്ടിലെയും ഉദ്യോഗസ്ഥര്‍ ഉള്‍പ്പെടുന്നതാണ് കമ്മിറ്റി. വിഷയത്തില്‍ എത്രയും വേഗം തീരുമാനമുണ്ടാക്കാന്‍ സുപ്രീം കോടതിയും നേരത്തേ നിര്‍ദ്ദേശം നല്‍കിയിരുന്നു. ഇതിന്‍റെ കൂടി അടിസ്ഥാനത്തിലാണ് കേന്ദ്രസര്‍ക്കാര്‍ അടിയന്തിര ഇടപെടല്‍ നടത്തിയിരിക്കുന്നത്.

ദുരിതബാധിത പ്രദേശങ്ങളില്‍ ശക്തമായി ഇടപെടാന്‍ സേനകള്‍ക്ക് ക്യാബിനറ്റ് സെക്രട്ടറി നിര്‍ദ്ദേശം നല്‍കി. വിവിധയിടങ്ങിലായി കൂടുതല്‍ മെഡിക്കല്‍ ക്യാമ്പുകള്‍ തുറക്കാനും നിര്‍ദ്ദേശിച്ചിട്ടുണ്ട്. ദുരിതാശ്വാസ പ്രവര്‍ത്തനങ്ങള്‍ക്കായി കൂടുതല്‍ സേനയെ കേന്ദ്രം കേരളത്തിലേക്ക് അയക്കും.

കഴിഞ്ഞ ദിവസം പ്രധാനമന്ത്രിയുമായി ബന്ധപ്പെട്ടപ്പോള്‍ മുല്ലപ്പെരിയാറുമായി ബന്ധപ്പെട്ട് തമിഴ്നാട്ടില്‍ നിന്ന് നേരിടുന്ന പ്രശ്നങ്ങള്‍ സംബന്ധിച്ച് മുഖ്യമന്ത്രി പിണറായി വിജയന്‍ ചര്‍ച്ച ചെയ്തിരുന്നു. വിഷയത്തില്‍ എല്ലാവിധ പിന്തുണയും കേന്ദ്രസര്‍ക്കാര്‍ വാഗ്ദാനം ചെയ്തതായി മുഖ്യമന്ത്രി അറിയിക്കുകയും ചെയ്തിട്ടുണ്ട്.